ऑनलाइन लोकमत
नाशिक, दि. 10- त्र्यंबक तालुक्यातील तळेगाव-अंजनेरी येथील बालिकेवर एका युवकाने अतिप्रसंग करण्याचा प्रयत्न केल्याची घटना उघडकीस येताच, या घटनेचे नाशिक परिसरात तीव्र पडसाद उमटले. रविवारी काही ठिकाणी हिंसाचाराच्या घटना घडल्या. त्या पार्श्वभूमीवर वातावरण चिघूळ नये, अफवा पसरु नयेत यासाठी मोबाईल डेटा आणि इंटरनेट सेवा दोन दिवसांसाठी खंडीत करण्यात आली आहे.
सोशल मीडियावरुन अफवा, प्रक्षोभक मजकूर पसरु नये हा यामागचा उद्देश आहे. तळेगाव-अंजनेरी येथील बालिकेवर एका युवकाने अतिप्रसंग करण्याचा प्रयत्न केल्याची घटना समोर येताच संपूर्ण नाशिकमध्ये आंदोलने सुरु झाली. या आंदोलनाला हिंसक वळण लागले. जमावाने पोलिसांवर दगडफेक करत एस.टी. बसेस व इतर वाहने पेटवून दिली.
दगडफेकीत ३५ पोलीस जखमी झाले. रात्री उशिरापर्यंत अनेक ठिकाणी जाळपोळीचे सत्र सुरूच होते. या घटनेतील आरोपीला पोलिसांनी तात्काळ अटक केली आहे. सुरक्षेच्या कारणास्तव नाशिक शहर आणि जिल्ह्यातील शाळा, कॉलेजेस बंद ठेवण्यात आली आहेत. दरम्यान गृहराज्यमंत्री दीपक केसरकर यांनी आज सकाळी नाशिकमध्ये येऊन पीडित मुलीच्या कुटुंबियांची भेट घेतली व 15 दिवसात आरोपपत्र दाखल करुन जलदगती न्यायालयात खटला चालवण्याचे आश्वासन दिले.