केडीएमसीच्या फायर ब्रिगेड जवानांना सलाम; चेंबरमध्ये पडलेल्या कुत्र्यांच्या पिल्लांचा वाचवला जीव 

एकीकडे मुक्या प्राण्यांना मारहाण करण्याच्या घटनेत वाढ होत असताना  कल्याणात  चेंबरमध्ये पडलेल्या तीन  कुत्र्यांच्या पिल्लांचा जीव  केडीएमसीच्या फायर ब्रिगेडने वाचवला आहे.

लोकमत न्यूज नेटवर्क : कल्याण 

एकीकडे मुक्या प्राण्यांना मारहाण करण्याच्या घटनेत वाढ होत असताना  कल्याणात  चेंबरमध्ये पडलेल्या तीन  कुत्र्यांच्या पिल्लांचा जीव  केडीएमसीच्या फायर ब्रिगेडने वाचवला आहे.  कल्याण पश्चिमेतील वसंत व्हॅली सोसायटीत आज सकाळी हा प्रकार घडला. यावेळी  अनेक अडचणी येऊनही पिल्लांच्या वारंवार ओरडण्यामुळे अग्नीशमन दलाचे जवानही कासावीस झाले होते. अखेर प्रयत्नांची शिकस्त करत पिल्लांना बाहेर काढले. या तीनही पिल्लांना ड्रेनेज चेंबरमधून बाहेर काढल्यानंतर उपस्थित नागरिकांनी एकच जल्लोष केल्याचे दिसून आले. 

वसंत व्हॅली सोसायटीच्या ड्रेनेज चेंबर्समध्ये कुत्र्याचे पिल्लू पडल्याची माहिती रहिवाशांनी केडीएमसीच्या फायर ब्रिगेडला दिली. त्यानूसार  फायर ब्रिगेडच्या जवानांनी घटनास्थळी धाव घेतली अन पिल्लाना वाचवण्यासाठी प्रयत्न सुरू केले. मात्र चेंबरमधील  जागा अरुंद असल्यामुळे अडचण येत होती. जिवाच्या आकांताने पिल्लंही ओरडत होती. त्यामुळे  जवानांचा जीवही भांड्यात पडला . जवानांनी आपले संपूर्ण कौशल्य पणाला लावत अक्षरशः मृत्यूच्या दाढेतून या कुत्र्याच्या पिल्लाची सुटका केली. चेंबरमध्ये अडकलेल्या या पिल्लाला बाहेर काढण्यास आणखी थोडा जरी वेळ लागला असता तर  इवल्याशा पिल्लांच्या जीवावर बेतले असते अशी माहिती मुख्य अग्निशमन अधिकारी नामदेव चौधरी यांनी दिली. कल्याण डोंबिवली महापालिकाअग्निशमन दलाच्या विनायक लोखंडे, राहुल भाकरे, निखिल इशाने, युवराज राठोड आदींच्या टीमने ही कामगिरी केली.