नाशिक : महाराष्ट्राचे भरतपूर समजल्या जाणाऱ्या नांदूरमध्यमेश्वर वन्यजीव अभयारण्याची ‘रामसर’च्या दर्जाची प्रतिक्षा अखेर संपली. केंद्रीय पर्यावरण समितीने याबाबत घोषणा शनिवारी केली. त्याचे पत्र लवकर नाशिक वन्यजीव विभागाला प्राप्त होणार आहे. नाशिकचे मुख्य वनसंरक्षक अनिल अंजनकर यांनीही यास दुजोरा दिला आहे.
दोन वर्षांपूर्वी वनविभागाने राज्य व केंद सरकारला याबाबत चा सादर केलेला प्रस्ताव मंजूर झाला आहे. आंतरराष्ट्रीय ख्यातीचे पाणथळ म्हणून हे राज्यातील पहिले ठिकाण ठरले. गेल्या कित्येक वर्षांपासून नाशिक जिल्ह्यातील निफाड तालुक्यातील नांदूरमध्यमेश्वर अभयारण्याला रामसरचा दर्जा मिळावा, यासाठी वनविभागातर्फे पाठपुरावा सुरू होता. स्वित्झर्लंडच्या रामसर सचिवालयाकडे केंद्र सरकारने गेल्या महिन्यात प्रस्ताव सादर केला. हा प्रस्ताव मंजूर झाल्याची माहिती नाशिक वनवृत्तचे मुख्य वनसंरक्षक अनिल अंजनकर यांनी दिली आहे. सध्या देशातील २६ पाणथळांच्या यादीत नांदूरमध्यमेश्वरचा समावेश आहे. सस्तन वन्यजीवांच्या आठ, तर चोवीस प्रजातींचे मासे, २६५ पेक्षा जास्त देशी-विदेशी पक्षी, पाचशेपेक्षा जास्त वनस्पतींचे प्रकार, ४१ प्रजातींचे फुलपाखरू आणि विविध पाणवनस्पती, अशी जैवविविधता या अभयारण्यात आहे. 'रामसर'मध्ये आढळणाऱ्या १४८ स्थलांतरीत पक्ष्यांपैकी ८८ प्रजाती नांदूरमध्यमेश्वरमध्ये पहावयास मिळतात. शिवाय देशी-विदेशी स्थलांतरित पक्ष्यांच्या २६५ प्रजाती असून, दरवर्षी वीस हजारांपेक्षा जास्त पक्ष्यांची नोंद तिथे होत असल्याची बाजू प्रस्तावात जमेची ठरली आहे. नांदूरमध्यमेश्वरला हा दर्जा प्राप्त झाल्याने, वैभवशाली पाणथळांच्या ठिकाणांत नाशिकची जगाच्या नकाक्षावर नवी ओळख निर्माण होईल. रामसरचा दर्जा मिळाल्याने येथील पर्यटनाला अधिक चालना मिळणार असून, आंतरराष्ट्रीय पर्यटकांची पावले इकडे वळण्याचा मार्ग खुला झाला. संवर्धनासह वन्यजीव अभयारण्याचे संरक्षण अधिक प्रभावी होण्यास मदत होणार असल्याचे मत वनधिकाऱ्यांनी व्यक्त केले.