हृदयद्रावक! तरुण मुलाच्या मृत्यूची बातमी कळताच वडिलांनीही सोडले प्राण

Sindhudurg News: आपल्या १८ वर्षीय तरुण मुलाचा अकाली अपघाती मृत्यू झाल्याची वार्ता कळताच जबर मानसिक धक्का बसलेल्या जन्मदात्या वडिलांनीही काही वेळातच प्राण सोडल्याची हृदयद्रावक घटना सिंधुदुर्ग जिल्ह्यातील सावंतवाडी येथे घडली आहे.

आपल्या १८ वर्षीय तरुण मुलाचा अकाली अपघाती मृत्यू झाल्याची वार्ता कळताच जबर मानसिक धक्का बसलेल्या जन्मदात्या वडिलांनीही काही वेळातच प्राण सोडल्याची हृदयद्रावक घटना सिंधुदुर्ग जिल्ह्यातील सावंतवाडी येथे घडली आहे. येथील क्रीश संभया या १८ तरुणाचा जवळच्या गावातील धरणात बुडून मृत्यू झाला होता. मुलाच्या मृत्यूची बातमी कळताच वडील सॅव्हियो संभया यांना जबर मानसिक धक्का बसला. तसेच त्यातच हृदयविकाराचा झटका येऊन त्यांचा मृत्यू झाला.

याबाबत मिळालेल्या अधिक माहितीनुसार सावंतवाडी येथील क्रिश संभया हा तरुण मंगळवारी मित्र-मैत्रिणींसह येथून जवळच असलेल्या कारिवडे येथील धरणावर फिरायला गेला होता. तिथे फोटो काढत असताना क्रिश याचा अचानक तोल जावून पाण्यात पडला. या घटनेची माहिती मिळताच पोलीस आणि ग्रामस्थांनी घटनास्थळी धाव घेतली. दरम्यान, रात्री ११ च्या सुमाराच त्याचा मृतदेह धरणाच्या पाण्यात तरंगताना आढळून आला.

दरम्यान, आपल्या मुलाच्या मृत्यूची माहिती मिळताच क्रीश संभया याचे वडिल सॅव्हियो संभया यांना धक्का बसला. त्यांची प्रकृती बिघडल्याने त्यांना रुग्णालयात दाखल करण्यात आले. तिथेत हृदयविकाराचा तीव्र झटका येऊन त्यांचा मृत्यू झाला.