नागपूर : केंद्रीय मंत्रिपदाची शपथ घेतल्यानंतर प्रथमच स्वगृही येणारे नागपूरचे खासदार नितीन गडकरी यांचे जोरदार स्वागत करण्यात आले. महाल येथील गडकरी वाड्यावर हजाराहून अधिक कार्यकर्ते व समर्थकांची गर्दी जमा झाली होती. ढोलताशांचा गजर, कार्यकर्त्यांकडून देण्यात येणार्या घोषणा अन् संपूर्ण परिसरात झालेली जोरदार आतषबाजी यामुळे महाल परिसर उजळून निघाला होता.
गडकरी रात्री ९ च्या सुमारास घरी येणार याची माहिती मिळाल्याने सायंकाळपासूनच कार्यकर्त्यांनी गडकरी वाड्याच्या परिसरात जमायला सुरुवात केली होती. येणार्या-जाणार्या प्रत्येकाला मिठाई वाटण्यात येत होती. रात्री १० वाजताच्या सुमारास गडकरी यांचे आगमन झाले अन् संपूर्ण परिसर ‘नितीन गडकरी आगे बढो, हम तुम्हारे साथ हैह्णच्या घोषणांनी निनादून गेला. गडकरी यांच्यासमवेत भाजपाचे प्रदेशाध्यक्ष देवेंद्र फडणवीस, आमदार कृष्णा खोपडे, सुधाकरराव देशमुख, माजी खासदार बनवारीलाल पुरोहित, महापौर अनिल सोले हे प्रामुख्याने उपस्थित होते. त्याचप्रमाणे परिसरात शहराच्या निरनिराळ्या वॉर्डातील नगरसेवक व भाजपाचे पदाधिकारीदेखील शुभेच्छा देण्यासाठी आले होते.
आबालवृद्धांची गर्दी नितीन गडकरी यांच्या स्वागतासाठी केवळ कार्यकर्त्यांचीच गर्दी होती असे नाही, तर नागपुरातील सर्व धर्माचे सामान्य नागरिकदेखील त्यांना शुभेच्छा देण्यासाठी उपस्थित होते. शेकडो महिला, ज्येष्ठ नागरिक यांनीदेखील गडकरींना शुभेच्छा दिल्या. काही महिलांनी गडकरींसाठी खास घरून मिठाई आणली होती. प्रचंड प्रमाणात गर्दी असल्यामुळे सर्वांचे स्वागत करणे शक्य झाले नाही; तरीदेखील गडकरी वाड्यावर पाणी व शीतपेयाची सोय करण्यात आली होती. रोशनाई अन् रांगोळी नितीन गडकरी यांना मिळालेले मंत्रिपद आणि त्यांचा वाढदिवस यानिमित्ताने गडकरी वाड्यावर सजावट करण्यात आली होती. वाड्यावर करण्यात आलेली रोशनाई व गडकरींचा चेहरा दर्शविणारी रांगोळी सर्वांचे लक्ष वेधून घेत होती. याशिवाय जागोजागी फुगेदेखील लावण्यात आले होते. गडकरींच्या वाढदिवसानिमित्त केकदेखील मागविण्यात आला होता. गडकरींच्या कुटुंबीयांनी रात्री उशिरा त्यांना ओवाळले. (प्रतिनिधी)