“जय पवार तुमचाच भाऊ आहे ना, एक फोन करा, काकी मदत करतील”; भाजपा नेत्याची रोहित पवारांवर टीका

Sudhir Mungantiwar Slams Rohit Pawar: शंकास्पद काही करू नका, हवेत का बोलत आहात, अशी टीका भाजपा नेत्यांनी केली.

Sudhir Mungantiwar Slams Rohit Pawar: अजित पवार यांच्या विमान अपघाती निधनानंतर एकीकडे संपूर्ण राज्य शोकाकूल असताना दुसरीकडे राष्ट्रवादी काँग्रेस शरद पवार गटाचे नेते रोहित पवार यांनी विविध दावे करण्यास सुरुवात केली. अद्यापही रोहित पवार विरोधी पक्षातील अनेक नेत्यांच्या भेटी घेत असून, याबाबत प्रेझेंटेशन देत आहेत. रोहित पवार यांनी अलीकडेच दिल्ली गाठत अरविंद केजरीवाल, मल्लिकार्जुन खरगे, सोनिया गांधी, राहुल गांधी यांच्या भेटी घेऊन अजित पवार यांच्या विमान अपघाताच्या चौकशीला पाठिंबा देण्याचे आवाहन केले. यावर अजित पवारांच्या राष्ट्रवादी काँग्रेससह भाजपा नेत्यांनी टीका केली आहे. 

सुनेत्रा पवार या उपमुख्यमंत्री आहेत. त्यांनी आपला पती गमावला आहे. पती गमावण्याचे दुःख मोठे आहे. याबाबत त्याही काळजी घेतील ना. शिवाय त्यांचे दोन चिरंजीव आहेत. कायद्याने सुनेत्रा पवार यांना उपमुख्यमंत्री म्हणून अधिकार दिलेले आहेत. त्यांनी आदेश दिले की, त्याची अंमलबजावणी करावी लागेल. चौकशी व्हायला हवी, परंतु, शंकास्पद काही करू नका, अशी टीका भाजपा नेते आणि आमदार सुधीर मुनगंटीवार यांनी रोहित पवार यांच्यावर केली. 

जय पवार तुमचाच भाऊ आहे ना, एक फोन करा

भाजपाच्या दबावामुळे जय पवार यांनी पत्रकार परिषद घेतली नाही, असा दावा रोहित पवार यांनी केला होता. यावर प्रतिक्रिया देताना सुधीर मुनगंटीवार म्हणाले की, जय पवार तुमचाच भाऊ आहे, टेलिफोन करायला पण वेळ नाही का, पैसे नाहीत का? हवेत का बोलत आहात. मी व्यवस्था करतो फोन करायची, मुख्यमंत्री देवेंद्र फडणवीस यांना सांगून फ्री टेलिफोनची व्यवस्था करायला सांगतो. पत्रकार परिषद घेणार होतात, का नाही घेतली एकदा विचार तर ना? तुमच्या काकी आहेत, त्या पण मदत करतील ना, या शब्दांत मुनगंटीवार यांनी रोहित पवारांवर निशाणा साधला.

दरम्यान, एफआयआरचा विषय आहे, बारामतीची घटना आहे, त्यामुळे तिथे एफआयआर करा, मुंबईत होत नाही. त्यामुळे झिरोमध्ये दाखल केला आणि बारामतीला पाठवला. अतिविशिष्ट कारण असेल तर एफआयआर घेतला जातो, असेही मुनगंटीवार यांनी सांगितले.