अनेक महिलांवर लैंगिक अत्याचार केल्याप्रकरणी सध्या अटकेत असलेला नाशिकमधील भोंदू ज्योतिषी अशोक खरात याच्याविरोधात आता पीडित महिला हिंमत करून तक्रारी नोंदवत आहेत. दरम्यान, या प्रकरणाचा तपास करत असलेल्या एसआयटीकडे गेल्या ५ दिवसांमध्ये ५० हून अधिक फोन आले आहेत. त्यामधून लोकांनी खरातविरोधात विविध प्रकारची माहिती दिली आहे. तसेत पीडित महिलांनी त्याच्या गुन्ह्यांबाबतही तक्रारही नोंदवली आहे, अशी माहिती या प्रकरणाचा तपास करत असलेल्या अधिकाऱ्यांनी दिली आहे.
अशोक खरातला बेड्या ठोकल्यानंतर या प्रकरणाचा तपास करण्यासाठी नियुक्त करण्यात आलेल्या एसआयटीने सर्वसामान्य नागरिकांकडून या प्रकरणासंबंधीची माहिती मिळवण्यासाठी दोन मोबाईल नंबर प्रसिद्ध केले होते. तेव्हापासून एसआयटीकडे या प्रकरणात खरातविरोधात माहिती देणारे सरासरी १५ ते २० फोन येत आहेत. या फोनमधून अनेक जण आपलंही लैंगिक शोषण झाल्याच्या, जबरदस्तीने वसुली केल्याच्या, तसेच अश्लील कंटेंटसंदर्भातील तक्रारी करत आहेत. सध्या एसआयटी या तक्रारींचा गांभीर्याने पडताळणी करत आहे.
दरम्यान, अशोक खरात याच्या अटकेनंतर चालवल्या जाणाऱ्या काळ्या कृत्यांचे अनेक घटना उघडकीस येत आहेत. एसआयटीच्या तपासात खरातच्या कार्यालयात आणि मंदिर ट्रस्टमध्ये वापरल्या जाणाऱ्या भयानक सांकेतिक भाषेचा खुलासा झाला आहे, या कोडवर्डचा वापर तो महिलांचे लैंगिक शोषण करण्यासाठी करत होता. ज्यावेळी अशोक खरात एखाद्या महिलेला आपल्या केबिनमध्ये बोलावत होता त्यावेळी तो केबीनमधील झुंबराची लाईट बंद करत होता, असे तपासात उघड झाले आहे.कर्मचाऱ्यांना केबीनमध्ये ज्यावेळी येऊ द्यायचे नसते त्यावेळी अशोक खरात झुंबराची लाईट बंद करत होता. झुंबराची लाईट हे कर्मचाऱ्यांसाठी कोडवर्ड होते. खरातया केबिनला काच बसवलेली होती, यातून बाहेरून आतील काही दिसत नव्हते. पण आतून बाहेरचे सगळे दिसत होते.