आंध्र, गुजरातला कऱ्हाडच्या गुळाची गोडी!

बाजार समितीत गुळाची आवक : सौद्यात परराज्यातील व्यापाऱ्यांची बोली; मागणी वाढल्याने उच्चांकी दराची अपेक्षा

कऱ्हाड : तालुक्यात खासगी तसेच सहकारी साखर कारखाने आहेत. या कारखान्यांत दरवर्षी कोट्यवधी टन उसाचे गाळप होते. ‘साखरेचा पट्टा’ म्हणून कऱ्हाड तालुक्याची ओळख आहे. मात्र, साखरेसोबत आता कऱ्हाडच्या गुळाची गोडीही वाढली आहे. येथील बाजार समितीमार्फत कऱ्हाडचा गूळ परराज्यात पोहोचत असून, मागणी जास्त असल्याने गुळाला विक्रमी भावही मिळत आहे. उसाला चांगला दर मिळावा, यासाठी शेतकरी संघटनांनी सध्या आंदोलनाची दिशा ठरवित कंबर कसली आहे. शेतकरीही चांगल्या दराच्या प्रतीक्षेत असून, गळीत हंगाम काही दिवसांवर येऊन ठेपला आहे. कऱ्हाडच्या बाजार समितीतही गुळाची आवक सुरू झाली आहे. सौद्यांना प्रारंभ झाला आहे. गत काही वर्षांत उसाची कमतरता, ऊसदराच्या मागणीसाठी संघटनांचे आंदोलन व ऊसतोड कामगार थांबतील का जातील, अशा कात्रीत कारखानदारांबरोबरच शेतकरी ही अडकला आहे. मात्र, या परिस्थितीत गुळाला उच्चांकी दर मिळत असल्याने शेतकरी गुऱ्हाळाकडे वळले असल्याचे चित्र आहे. चांगला दर मिळत असल्याने शेतकरी गुऱ्हाळघराकडे ऊस पाठवित आहे. हंगामाला उशीर झाल्यास उसाचे वजन घटेल. तसेच गुळाचे पैसे एका महिन्यात एकरकमी मिळत असल्याने शेतकऱ्यांनी गुऱ्हाळघरांचा रस्ता धरला आहे. वास्तविक, कऱ्हाड तालुक्यात कृष्णा, सह्याद्री, जयवंत शुगर, रयत आदी कारखाने आहेत. या कारखान्यांवर दरवर्षीच्या हंगामात कोट्यवधी टन उसाचे गाळप होते. त्यातून मोठ्या प्रमाणावर साखरेची निर्मितीही केली जाते.मात्र, साखरेबरोबरच कऱ्हाड तालुक्यात गुळाचे उत्पादनही मोठे आहे. ज्यापटीत ऊस कारखान्याला गळितासाठी घातला जातो त्याचपटीत हजारो हेक्टर क्षेत्रातील ऊस गुऱ्हाळगृहांवर गळीत केला जातो. त्यातून गूळनिर्मितीही मोठ्या प्रमाणावर होते. गुऱ्हाळ गृहांमध्ये तयार करण्यात आलेला गूळ कऱ्हाडच्या मार्केटमध्ये घालण्यात येतो. गुळाच्या मार्केटसाठी कऱ्हाड पूर्वीपासूनच परिचित आहे. येथील मार्केटमध्ये गुळाला चांगला भाव मिळतो. तसेच सौदेही लवकर होत असल्याने कऱ्हाडसह आसपासच्या तालुक्यातील शेतकरीही आपला गूळ विक्रीसाठी येथील मार्केटमध्ये आणतात. यावर्षीच्या गूळ सौद्यांना नुकताच प्रारंभ झाला आहे. येथील बाजार समितीमधून गूळ मुंबई व गुजरातच्या मार्केटला पुरविण्यात येतो. आठवड्यातून दोन दिवस गुळाचे सौदे होतात. या दोन दिवसांत आंध्रप्रदेश, गुजरात तसेच अन्य काही राज्यांतील व्यापारी कऱ्हाडचा गूळ खरेदी करतात. संबंधित राज्यांमध्ये येथील गुळाला मोठ्या प्रमाणात मागणी आहे. त्यामुळे मागणीच्या प्रमाणात पुरवठा करताना गुळाला दरही चांगला मिळत आहे. (प्रतिनिधी)गतवर्षी ४७ कोटी ४४ लाखांची उलाढालकऱ्हाड बाजार समितीत गतवर्षी गूळ सौद्याच्या माध्यमातून ४७ कोटी ४४ लाख एवढी प्रचंड उलाढाल झाली होती. आर्थिक वर्षातील उलाढालीचा हा आकडा प्रत्येक वर्षी वाढत असून, यावर्षीही यापेक्षा मोठी उलाढाल बाजार समितीला अपेक्षित आहे.विक्रमी ६ हजार ३०० दरबाजार समितीत गूळ सौद्याला दरवर्षी विक्रमी दर मिळतो. गतवर्षी येथे ६ हजार ३०० एवढा दर मिळाला होता. तर सरासरी दराचे प्रमाण २ हजार ८०० रुपये होते. यावर्षी ३ हजार २०० पासून सुरुवात गुळाच्या सौद्याला परराज्यातील व्यापारीही उपस्थित असतात. येथील शेतकऱ्याच्या गुळाला उच्चांकी दर मिळावा, यासाठी बाजार समिती प्रयत्न करीत असते. मात्र, चांगल्या दरासाठी शेतकऱ्यांनीही दर्जेदार गूळ उत्पादनाबाबत काळजी घ्यावी. - बी. बी. निंबाळकर,प्रभारी सचिव, बाजार समिती