कृष्णा गोविंद कमलापुरे (वय १६, रा. मुरंबी, ता. लोहा) व वैभव राजकुमार मसुरे (१३, रा. हाळी, ता. उदगीर) अशी मृतांची नावे आहेत. एक वृध्द, कृष्णा कमलापुरे, वैभव मसुरे या तिघांनी उदगीर तालुक्यातील येनगेवाडी येथील एकाच्या मेंढ्या राखण्यासाठी घेतल्या होत्या. ज्या ठिकाणी हिरवळ, झाडाचा पाला आहे, तिथे ते मेंढ्या चारत असत. रात्र जिथे होईल, तिथेच ते मुक्काम करत. रविवारी दुपारी चाकूरनजीकच्या एका वस्तीजवळील तलावात कृष्णा व वैभव हे दोघे अंघोळीसाठी गेले होते. दरम्यान, त्यांना पाण्याचा अंदाज न आल्याने कृष्णा कमलापुरे व वैभव मसुरे यांचा पाण्यात बुडून मृत्यू झाला.
या घटनेची माहिती ब्रह्मवाडी येथील शाम माकणे यांनी चाकूर पोलिसांना दिली. पोलीस निरीक्षक सोपान सिरसाट, पो. हे. कॉ. रामचंद्र गुंडरे, हणमंत आरदवाड यांनी घटनास्थळी जाऊन पंचनामा केला. याप्रकरणी अकस्मात मृत्यू म्हणून नोंद करण्यात आली आहे. उत्तरीय तपासणीनंतर मृतदेह अंत्यविधीसाठी नातेवाईकांच्या ताब्यात देण्यात आले.