गाळेधारकांकडून साडेअकरा लाखांची वसुली; सहा दुकानांना पथकाने केले सील

लातूर महानगरपालिकेच्या मालकीचे ११२७ आणि बीओटी तत्त्वावरील ८१० असे एकूण १९३७ गाळे आहेत. या गाळेधारकांकडे १३ कोटी २० लाख २६ हजार २०७ रुपये भाडे थकलेले आहे. यात ६ कोटी ६१ लाख २७ हजार ६३० रुपये चालू भाडे आहे. त्यामुळे महानगरपालिकेने विशेष वसुली मोहीम सुरू केली आहे. १९ कोटी ८१ लाख ५३ हजार ८३७ रुपयांची वसुली करण्यात येणार आहे. मंगळवारी गांधी मैदानातील क्रमांक १११ तळमजला व्यापारी संकुलातील गाळेधारकांकडून वसूल करण्यात आली. वसुली मोहिमेत आठ लाख १२ हजार ३३७ रुपये चेकद्वारे तर ३ लाख ५५ हजार रुपये नगदी असे एकूण ११ लाख ६७ हजार ३३७ रुपयांची वसुली करण्यात आली. तर वसुलीला प्रतिसाद न देणाऱ्या सहा गाळेधारकांचे दुकान सील करण्यात आले. यातील दोघांनी थकलेली रक्कम भरल्यानंतर सील करण्यात आले. दरम्यान, वसुली मोहीम उपायुक्त वसुधा फड, सहायक आयुक्त सुंदर बोंदर ,मालमत्ता व्यवस्थापक सतीश टेंकाळे, क्षेत्रीय अधिकारी बंडू किसवे, समाधान सूर्यवंशी, संजय कुलकर्णी, मालमता विभागातील कर्मचारी जगन्नाथ पवार, पवन सुरवसे, अभिषेक माळवे, रामजीवन लोखंडे, अकबर शेख, अमदज शेख आदी कर्मचाऱ्यांच्या पथकाने यशस्वी केली.