Latur Paper Leak: फार्मसीचा पेपर व्हायरल, प्राध्यापकाविरोधात गुन्हा, केंद्रप्रमुख आला गोत्यात

लातूर येथील कातपूर रोडवरील ‘कॉलेज ऑफ फार्मसी’ येथे बी. फार्मसी परीक्षेचा पेपर नियोजित वेळेपूर्वीच सोशल मीडियावर व्हायरल केल्याप्रकरणी लातुरातील विवेकानंद चौक पोलिस ठाण्यात एका साहाय्यक प्राध्यापकावर गुन्हा दाखल करण्यात आला आहे.

लातूर: शहरातील कातपूर रोडवरील ‘कॉलेज ऑफ फार्मसी’ येथे बी. फार्मसी परीक्षेचा पेपर नियोजित वेळेपूर्वीच सोशल मीडियावर व्हायरल केल्याप्रकरणी लातुरातील विवेकानंद चौक पोलिस ठाण्यात एका साहाय्यक प्राध्यापकावर गुन्हा दाखल करण्यात आला आहे.

पोलिसांनी सांगितले, शनिवार, २५ एप्रिल २०२६ रोजी बी. फार्मसी अभ्यासक्रमाची लेखी परीक्षा सुरू होती. या केंद्रावर साहाय्यक प्राध्यापक अतुल लिंबराज कदम यांची ‘केंद्रप्रमुख’ म्हणून नियुक्ती करण्यात आली होती. दरम्यान, दुपारी १:२२ वाजता त्यांनी ‘एनएम-४५' या विषयाची प्रश्नपत्रिका संगणकावरून डाउनलोड केली. मात्र, दुपारी १:४५ वाजता हीच प्रश्नपत्रिका ‘केंद्र कोड ९७३’ सह विद्यार्थ्यांच्या मोबाइलवर व्हायरल झाल्याचे विद्यापीठ प्रशासनाच्या निदर्शनास आले. विद्यापीठाने केलेल्या प्राथमिक चौकशीमध्ये हा गैरप्रकार निष्पन्न झाला. त्यानंतर कॉलेजचे प्राचार्य श्रीनिवास बच्चुय्या बुमरेला यांनी विवेकानंद चौक पोलिस ठाण्यात तक्रार दिली. या तक्रारीवरून अतुल कदम या साहाय्यक प्राध्यापकाविरोधात ‘महाराष्ट्र विद्यापीठ, मंडळ आणि इतर निर्दिष्ट परीक्षांमधील गैरप्रकारांना प्रतिबंध करण्याबाबत अधिनियम’ कलम ३ आणि ४ नुसार गुन्हा दाखल करण्यात आला आहे.

तपास पोलिस निरीक्षक संतोष पाटील यांच्या मार्गदर्शनाखाली स.पो.नि. व्ही.एस. मुळे हे तपास करत आहेत. परीक्षेच्या गोपनीयतेचा भंग करून पेपर व्हायरल करण्यामागे आणखी काेण आहे का? याचाही शोध आता पोलिस घेत आहेत. या घटनेमुळे शैक्षणिक वर्तुळात मोठी खळबळ उडाली आहे.