आईला डबा देण्यासाठी निघालेल्या मुलाचा मृत्यू
By लोकमत न्यूज नेटवर्क | Published: April 19, 2021 04:18 AM2021-04-19T04:18:11+5:302021-04-19T04:18:11+5:30
लातूर : आई व भाऊ कोरोनाबाधित असल्याने त्यांना वेगवेगळ्या ठिकाणी उपचारासाठी दाखल केले आहे. या दोघांना डबा देण्यासाठी दुचाकीवरून ...
लातूर : आई व भाऊ कोरोनाबाधित असल्याने त्यांना वेगवेगळ्या ठिकाणी उपचारासाठी दाखल केले आहे. या दोघांना डबा देण्यासाठी दुचाकीवरून निघालेल्या तरुणाला भरधाव कारने धडक दिली. या अपघातात त्याचा मृत्यू झाला. ही घटना लातुरातील उड्डाणपुलावर रविवारी रात्री ८.३० वाजेच्या सुमारास घडली.
पोलिसांनी सांगितले, दुचाकीवरून औसा रोड येथील कोविड सेंटरमध्ये भावाला भोजनाचा डबा दिल्यानंतर शासकीय रुग्णालयात उपचार घेत असलेल्या आईला डबा देण्यासाठी निघालेल्या तरुणाला भरधाव कारने उड्डाणपुलावर जोराची धडक दिली. या अपघातात सदर तरुण गंभीर जखमी झाला. माहिती मिळताच पोलीस कर्मचारी अशोक चौगुले, गवारे हे घटनास्थळी दाखल झाले. त्यांनी जखमी तरुणाला रुग्णवाहिकेतून उपचारासाठी रुग्णालयात पाठविले. मात्र, त्याचा उपचारापूर्वीच मृत्यू झाला. याबाबत शिवाजीनगर पोलीस ठाण्यात रात्री उशिरापर्यंत कुठलीही नोंद नव्हती.
लातूर शहरातील उड्डाणपुलावरून शासकीय रुग्णालयाकडे तरुण दुचाकीवरून निघाला होता. दरम्यान, औसा रोडच्या दिशेने एक भरधाव कार निघाली होती. सदर तरुणाच्या दुचाकीला या कारने जोराची धडक दिली. या अपघातात तरुण जखमी झाला. त्यानंतर रुग्णालयात नेताना त्याचा मृत्यू झाला. तो कोविड सेंटरमध्ये उपचार घेणाऱ्या भाऊ आणि आईला डबा देण्यासाठी निघाला होता.