लातूर : नांदेड परिक्षेत्रातील नांदेड, लातूर, हिंगाेली आणि परभणी जिल्ह्यातील विविध पाेलिस ठाण्यांच्या हद्दीत वेगवेगळ्या पाेलिस पथकांनी धाडी टाकल्या. यात तब्बल ७ काेटींचा मुद्देमाल जप्त केला. ही कारवाई दुसऱ्या टप्प्यात १ ते ३० जूनअखेर करण्यात आली. यात लातूर जिल्ह्यात ५२० जणांविराेधात गुन्हे दाखल केले असून, ३ काेटी ५० लाख १९ हजार ३३८ रुपयांचा मुद्देमाल जप्त केला आहे.पाेलिसांनी सांगितले, नांदेड परिक्षेत्रातील चारही जिल्ह्यात अवैध दारु, मटका, जुगार, ऑनलाइन लाॅटरी, क्रिकेट बेटिंग, गुटखा, अंमली पदार्थ, वेश्याव्यवसाय, वाळू उपसा व वाहतूक आणि अवैध प्रवासी वाहतुकीविराेधात पाेलिस उपमहानिरीक्षक शहाजी उमाप यांच्या आदेशानुसार १ मे पासून अवैध व्यवसाय विराेधी अभियान सुरु करण्यात आले आहे.
पाेलिसांनी राबविलेल्या अवैध व्यवसायविराेधात अभियान १ दरम्यान अवैध व्यवसायात गुंतलेल्या १ हजार ७२१ आराेपींविराेधात १ हजार ५६१ गुन्हे दाखल करण्यात आले आहेत. त्यांच्याकडून एकूण ७ काेटी ७९ लाख ४७ हजार ४५ रुपयांचा मुद्देमाल जप्त केला आहे. १ ते ३० जून या दरम्यान, अवैध व्यवसायाविराेधात अभियानाचा दुसरा टप्पा हाेता. यामध्ये २ हजार ३१६ जणांविराेधात २ हजारे १७ गुन्हे दाखल करण्यात आले. यामध्ये ६ काेटी ९३ लाख ६० हजार ३६४ रुपयांचा मुद्देमाल जप्त केला आहे.
अवैध वाळूविरुद्ध कारवाई; दीड काेटींचा मुद्देमाल जप्त.लातूर जिल्ह्यातील चाकूर येथील उपविभागी पाेलिस अधिकाऱ्यांनी अहमदपूर हद्दीत अवैध वाळूविराेधात कारवाई केली. यावेळी त्यांनी वाहनांसह वाळूचा साठा असा एकूण तब्बल १ काेटी ४५ लाख ९८ हजारांचा मुद्देमाल जप्त केला. जुलै महिन्यात अचानकपणे चार मासरेड केल्या जाणार असल्याचेही सूत्रांनी सांगितले.