अध्यादेश नसल्याने टोल बैठक रद्द

बैठकीबाबत शहरात उत्सुकता : लवकरच नवीन तारीख जाहीर होणार

कोल्हापूर : कोल्हापूरच्या वादग्रस्त टोलप्रश्नी प्राथमिक चर्चा करण्यासाठी आज, बुधवारी मुंबईत मूल्यांकन समितीची होणारी पहिलीच बैठक अचानक रद्द करण्यात आली. मूल्यांकन समिती स्थापण्याबाबत निर्णय झाला तरी याबाबत नगरविकास मंत्रालयाकडून अध्यादेश जारी करण्यात आला नाही. अध्यादेश नसल्याने बैठकीतील निर्णयाबाबत कायदेशीर अडचणी निर्माण होऊ शकतात, त्यामुळे रद्द झालेली बैठक आता अध्यादेश काढल्यानंतर पुन्हा घेण्यात येणार असल्याचे सूत्रांनी सांगितले.
टोल प्रश्नावर पर्याय सूचविण्यासाठी नेमलेल्या मूल्यांकन समितीचे अध्यक्ष व सार्वजनिक बांधकाममंत्री (सार्वजनिक उपक्रम) एकनाथ शिंदे यांच्या मंत्रालयातील दालनात होणाऱ्या या पहिल्या बैठकीबाबत शहरात कमालीची उत्सुकता होती. मुंबईतील या बैठकीसाठी पालकमंत्री चंद्रकांतदादा पाटील यांच्यासह सार्वजनिक बांधकाम राज्यमंत्री विजय देशमुख, आमदार राजेश क्षीरसागर, चंद्रदीप नरके व अमल महाडिक, महापौर तृप्ती माळवी, आयुक्त विजयालक्ष्मी बिदरी व पोलीस अधीक्षक डॉ. मनोजकुमार शर्मा, नगरविकास विभागाचे प्रधान सचिव, आदींना निमंत्रित करण्यात आले होते. महाराष्ट्र रस्ते विकास महामंडळाच्या (एमएसआरडीसी) उपाध्यक्षांनी समिती सदस्यांना काल, मंगळवारी रात्री उशिरा बैठक रद्दबाबत सदस्यांना कळविले. बैठकीत टोलच्या पर्यायावर प्राथमिक चर्चा तसेच प्रत्यक्ष प्रकल्पास भेट देण्याची तारीख निश्चित केली जाणार आहे. शहर टोलमुक्त करण्यासाठी बैठक हा पहिला टप्पा आहे. त्यामुळेच या बैठकीतील निर्णयाबाबत सर्वपक्षीय टोलविरोधी कृती समितीसह शहरवासीयांना उत्सुकता होती. आता पुन्हा जानेवारीच्या शेवटच्या आठवड्यात बैठक होण्याची शक्यता असल्याचे सूत्रांनी स्पष्ट केले. (प्रतिनिधी)

टोल रद्द करण्याबाबत जोरदार हालचाली सुरू झाल्याने शहरवासीयांत समाधानाचे वातावरण होते. मात्र, आजची बैठक अचानक रद्द केल्याने सरकारच्या भूमिकेबाबत संशय निर्माण होऊ लागला आहे. शिवसेना व भाजपच्या वरिष्ठ नेत्यांनी कोल्हापूरला टोलमुक्त करण्याचे आश्वासन दिले आहे. फेब्रुवारीअखेर आश्वासन पूर्ण करण्याची जबादारी पार पाडावी. अन्यथा व्यापक जनआंदोलनाद्वारे अभिवचनाची आठवण करून द्यावी लागेल.
- निवास साळोखे, निमंत्रक - टोलविरोधी कृती समिती