नवे पारगाव : इमारत करार वादातून नवे पारगाव (ता.हातकणंगले ) येथील इंदुमती सर्व्हिसिंग सेंटरसमोर सुनील निवृत्ती गायकवाड (रा. ऐतवडे खुर्द, ता.वाळवा, जि.सांगली) यांना शिवीगाळ करून दोन दात पाडून मारहाण करण्यात आली. याप्रकरणी आनंदराव वसंतराव सरनाईक (रा. वारणानगर, ता.पन्हाळा) याच्यावर गुन्हा दाखल झाला आहे. घटना सायंकाळी पाचच्या सुमारास घडली. वडगाव पोलिसांत नोंद झाली आहे.
पोलिसांतून मिळालेली माहिती अशी की, सुनील गायकवाड यांनी वारणानगर येथील वारणा सहकारी बँकेशेजारी असणारी आनंदराव सरनाईक याची इमारत भाड्याने घेऊन पृथ्वी सायन्स अकॅडमी सुरू केली होती. गायकवाड व सरनाईक यांच्यात याबाबत भाडेकरार झाला होता. भाडेकरारावरून दोघांत वाद सुरू होता.
मंगळवारी सायंकाळी सव्वापाचच्या सुमारास सुनील गायकवाड हे नवे पारगाव येथील इंदुमती सर्व्हिसिंग सेंटरसमोर उभे राहिले होते. संशयित आरोपी आनंदराव सरनाईक आपल्या स्कार्पिओ गाडीमधून तेथे आला. सुनील गायकवाड यांना अर्वाच्य भाषेत शिवीगाळ केली. गायकवाड यांच्या तोंडावर जोरात ठोसा मारला असता त्यांचे दोन दात पडले. त्यांना गंभीर जखमी केले. दोन दिवसांत पैसे नाही दिले तर ठार मारीन, अशी धमकीही दिली.
वडगावचे पोलीस निरीक्षक संतोष घोळवे यांच्या मार्गदर्शनाखाली पोलीस उपनिरीक्षक खान अधिक तपास करीत आहेत.