लाेकमत न्यूज नेटवर्क
कोल्हापूर : उपवर तरुणी व पालकांचे प्रबोधन होण्यासाठी पदवीधर मित्र माणिक पाटील चुयेकर यांनी ‘शेतकरी नवरा हवा’ हा अभिनव उपक्रम सुरू केला आहे. याचे उद्घाटन कणेरी मठाचे अदृश्य काडसिद्धेश्वर स्वामी यांच्या हस्ते मठावर झाले. हे अभियान जिल्हाभर राबविले जाणार आहे.
या उपक्रमाची माहिती देताना चुयेकर म्हणाले, शेती व्यवसाय त्रासदायक आणि कमी उत्पन्न देणारा असल्याचा समज समाजात पसरला आहे. यामुळे आज ‘शेतकरी नवरा नकोच’ ही भावना मोठ्या प्रमाणावर वाढीस लागली आहेत. यातून वेगळीच सामाजिक परिस्थिती निर्माण झाली आहे. लग्न ठरत नसल्याच्या नैराश्यातून आत्महत्याही वाढीस लागल्या आहेत. शेती याेग्य प्रकारे कसल्यास कुटुंबाचा उदरनिर्वाह चांगल्या प्रकारे होऊ शकतो, हे सिद्ध झाले आहे. हाच धागा पकडून हा उपक्रम राबवला असल्याचे चुयेकर यांनी सांगितले.
..........................................
कचरावेचकांना मनरेगांतर्गत काम देण्याची ‘अवनि’ची मागणी
लोकमत न्यूज नेटवर्क
कोल्हापूर : राज्य सरकारने मनरेगा योजनेची व्याप्ती वाढवू् कचरावेचकांचा त्यात समावेश करून त्यांना हक्काचा रोजगार द्यावा, अशी मागणी अवनि संस्थेतर्फे अनुराधा भोसले यांनी ग्रामविकास हसन मुश्रीफ यांच्याकडे निवेदनाद्वारे केली आहे. यावेळी मुश्रीफ यांनी या संदर्भात संबंधित विभागाच्या पदाधिकाऱ्यांची बैठक घेऊन कचरावेचकांना न्याय मिळवून देऊ, अशी ग्वाही दिली.
मंत्री मुश्रीफ यांना दिलेल्या निवेदनात म्हटले आहे की, कोरोनामुळे कचरावेचकांचा रोजगार संपला असून महिला भंगार गोळा करण्यास धजावत नसल्याने कुटुंबावर उपासमारीची वेळ आली आहे. त्यामुळे कचरा वर्गीकरण हा विषय ‘मनरेगा’मध्ये समाविष्ट केल्यास त्यांना हक्काचा रोजगार मिळू शकेल. संगीता लाखे, रेखा सोनटक्के, मीना सोनटक्के, सविता सोनटक्के, अंजली लाखे, जैनुद्दीन पन्हाळकर, सतीश पाटील उपस्थित होते.