पुनर्भेट : बघ्यांच्या गर्दीमुळे दुसरे पिल्लू वंचित
कोल्हापूर : कसबा बावडा येथील उसाच्या शेतात आईपासून दुरावलेले दुर्मीळ वाघाटीचे (वाईल्ड रस्टी स्पॉटेड कॅट) एक पिल्लू आईच्या कुशीत विसावले. त्याच्या आईसोबत पुनर्भेटीचा वनविभागाचा प्रयोग यशस्वी झाला असला तरी बघ्यांच्या गर्दीमुळे दुसऱ्या पिल्लाची मात्र त्याच्या आईशी भेट होऊ शकलेली नाही. वनविभागाचे पशुवैद्यकीय अधिकारी संतोष वाळवेकर यासाठी प्रयत्नशील आहेत. आईसोबतचा हा पुनर्भेेटीचा सोहळा वनविभागाच्या कॅमेऱ्यात बंद झाला आहे.
कसबा बावडा येथील रमेश पाटील यांच्या उसाच्या शेतात ३० नोव्हेंबर रोजी आढळलेली वाघाटीची ही दोन पिल्ले बिबट्याची असल्याच्या अफवेमुळे काही उत्साही नागरिकांनी या ठिकाणी गर्दी केली. यामुळे त्यांची आई या पिल्लांजवळ आली नाही. ही पिल्ले बिथरून जाऊ नयेत म्हणून बावडा रेस्क्यू फोरमच्या स्वयंसेवकांनी या पिल्लांना तातडीने वनविभागाच्या नियंत्रण कक्षाकडे सुपूर्द केले.
वन्यजीव संक्रमण व उपचार केंद्राचे स्वयंसेवक ऋषिकेश मेस्त्री, अमित कुंभार, समर्थ हराळे, अनिल ढोले, सानिका सावंत, वंशिका कांबळे यांच्यासोबत वाईल्ड लाईफ प्रोटेक्शन अँड रिसर्च सोसायटी, बावडा रेस्क्यू फोरमचे स्वयंसेवक, कोल्हापूर वनविभागाचे उपवनसंरक्षक रावसाहेब काळे, करवीरचे वनक्षेत्रपाल सुधीर सोनावणे, फिरत्या पथकाचे वनक्षेत्रपाल युवराज पाटील, वनपाल विजय पाटील, वनरक्षक रुकेज मुल्लाणी गेले दोन दिवस या परिसरात ठिय्या मांडून आहेत.
वाघाटीच्या या दोन पिल्लांचे अंदाजे वय १३ ते १७ दिवस असून, मादी पिल्लाने नुकतेच डोळे उघडले होते; तर नर पिल्लाचे डोळे अद्यापही उघडलेले नव्हते. आईच्या दुधावर अवलंबून असणाऱ्या या पिल्लांची लवकरात लवकर आईसोबत पुनर्भेट व्हावी म्हणून वरिष्ठ वन अधिकाऱ्यांंशी चर्चा केली. त्यानुसार त्याच दिवशी संध्याकाळी त्याच ठिकाणी पुनर्भेेटीसाठी या दोन्ही पिल्लांना सुरक्षितरीत्या ठेवले. ही प्रक्रिया नोंद करण्यासाठी कॅमेरा ट्रॅप लावल्याची माहिती डॉ. संतोष वाळवेकर यांनी दिली आहे.
पिल्लाच्या हाकेला आईचा प्रतिसाद
एका पिल्लाने आईला आवाज देणे सुरू केले; परंतु दिवसभरातील गर्दीमुळे घाबरलेल्या वाघाटीने पिल्लांना प्रतिसाद दिला नव्हता. दोन ते तीन वेळा जागा बदलल्यानंतर १ डिसेंबर २०२० रोजी पहाटे ०५.४९ वाजण्याच्या सुमारास पिल्लांच्या हाकेला प्रतिसाद देत दबकत-दबकत येऊन मादी पिलास आई घेऊन गेली. मात्र, घाबरल्यामुळे ती दुसऱ्या पिल्लास घेऊन गेली नाही. या पिल्लाच्या आईसोबतच्या पुनर्भेटीसाठी वनविभागाचे प्रयत्न सुरू आहेत.
-------------------------------
फोटो : 0२१२२0२0 -कोल-वाघाटी पिल्लू
फोटो ओळी : कोल्हापुरातील कसबा बावडा येथे शेतात आढळलेल्या वाघाटीच्या पिल्लाची आईशी भेट झाली असली तरी बघ्यांच्या गर्दीमुळे दुसऱ्या पिल्लाला आईची प्रतीक्षा आहे.
फोटो : 0२१२२0२0 -कोल-वाघाटी मदर
फोटो ओळी : कोल्हापुरातील कसबा बावडा येथे शेतात आढळलेल्या वाघाटीच्या पिल्लाची आईशी झालेली पुनर्भेट वनविभागाच्या ट्रॅप कॅमेऱ्यात बंदिस्त झाली आहे.