Kolhapur News: एकतर्फी प्रेमातून शाळकरी मुलीचे अपहरण, तरुणास चोप

माझ्यासोबत लग्न कर. नाहीतर तुझ्या वडिलांचा आणि भावाचा खून करणार, अशी दमदाटी करीत त्याने पीडित मुलीस मारहाण केली

कोल्हापूर : एकतर्फी प्रेमातून १४ वर्षीय शाळकरी मुलीचे अपहरण करून विनयभंग केल्याप्रकरणी सिद्धार्थ राजू कोळेकर (वय २१, रा. राजेंद्रनगर, कोल्हापूर) याच्यावर जुना राजवाडा पोलिस ठाण्यात सोमवारी (दि. ९) गुन्हा दाखल झाला.

दरम्यान, शेंडा पार्क येथे मुलीच्या नातेवाइकांनी बेदम मारहाण केल्याने जखमी झालेल्या कोळेकरला उपचारासाठी सीपीआरमध्ये दाखल करण्यात आले. त्याने दिलेल्या फिर्यादीनुसार राजारामपुरी पोलिसांनी मुलीच्या नातेवाइकांवर गुन्हा दाखल केला.

जुना राजवाडा पोलिसांनी दिलेल्या माहितीनुसार, सिद्धार्थ कोळेकर हा सोमवारी सकाळी पीडित मुलीस खासबाग येथून जबरदस्तीने आपल्या दुचाकीवरून घेऊन गेला होता. शेंडा पार्क परिसरात नेऊन त्याने तिला धमकाविले.

माझ्यासोबत लग्न कर. नाहीतर तुझ्या वडिलांचा आणि भावाचा खून करणार, अशी दमदाटी करीत त्याने पीडित मुलीस मारहाण केली. तसेच तिचा विनयभंग केला. काही वेळातच पीडित मुलीच्या नातेवाइकांनी कोळेकर याचा शोध घेऊन त्याला बेदम मारहाण केली. त्याच्यावर सीपीआरमध्ये उपचार करण्यात आले.