‘राजर्षी शाहू ग्रामप्रशासन सुधारणा कार्यक्रम’

जिल्हा परिषदेचा पुढाकार : अभिलेख अद्ययावत करण्याचा प्रयत्न

कोल्हापूर : ग्रामपंचायत स्तरावरील अभिलेखे अद्ययावत व सुस्थितीत ठेवण्यासाठी राजर्षी शाहू ग्रामप्रशासन सुधारणा कार्यक्रमाची सुरुवात केल्याची माहिती जिल्हा परिषदेचे अध्यक्ष उमेश आपटे व मुख्य कार्यकारी अधिकारी विजय सूर्यवंशी यांनी पत्रकार परिषदेत दिली. ९ आॅगस्ट ते २ आॅक्टोबरपर्यंत हे अभियान राबविले जाणार असल्याचेही त्यांनी सांगितले. केंद्र सरकारच्या ७३ व्या घटना दुरुस्तीनुसार ग्रामपंचायतीस घटनात्मक दर्जा प्राप्त झालेला आहे. अनेक महत्त्वाच्या योजना व विकासकामे ग्रामपंचायतीकडे हस्तांतरण केलेली आहेत. यासाठी ग्राम व्यवस्थेमध्ये सुप्रशासनाची गरज आहे. ग्रामपंचायत स्तरावरील आर्थिक व प्रशासकीय बाबींसंदर्भातील घरठाणपत्रक, कर आकारणी नोंदवही, किरकोळ वसुली नोंदवही, खर्चाची प्रमाणके, बांधकामासंदर्भातील करारपत्रे, मोजमाप पुस्तके, स्थावर व जंगम मालमत्ता नोंदवही, जन्म, मृत्यू व विवाह नोंदवही, रोजकीर्द आदी महत्त्वाचे अभिलेखे आहेत. त्याचा वापर भविष्यात वारंवार करावा लागतो. अभिलेखांचे वर्गीकरण व स्कॅनिंग केल्यानंतर भविष्यात मागील कागदपत्रे तत्काळ व सुरक्षित उपलब्ध होऊन प्रशासकीय कामकाज करणे अत्यंत सोयीचे होणार आहे. यासाठी कोल्हापूर जिल्हा परिषदेने सर्व ग्रामपंचायतीच्या कामकाजात सुधारणा व सुसूत्रता आणण्यासाठी ९ आॅगस्ट, क्रांतीदिनापासून ‘राजर्षी शाहू ग्रामप्रशासन सुधारणा कार्यक्रम’ हाती घेतला आहे. ग्रामपंचायतींचे रेकॉर्ड अद्ययावत व्हावे, यासाठी प्रयत्न सुरू असून चांगले काम करणाऱ्या ग्रामपंचायतींचे मूल्यांकनही केले जाणार आहे.हे अभियान प्रभावीपणे राबविण्यासाठी जिल्हा परिषद व पंचायत समिती स्तरावर सनियंत्रण समितीची स्थापना करण्यात आली आहे. जिल्हास्तरीय समितीत मुख्य कार्यकारी अधिकारी तर पंचायत समिती स्तरावर गटविकास अधिकारी अध्यक्ष असणार आहेत.