इचलकरंजी : लॉकडाऊन असतानाही दुकानातून मांस विक्री सुरू असल्याने येथील विक्रमनगर परिसरातील एका मांसाहारी दुकानावर गावभाग पोलिसांनी छापा टाकून कारवाई केली. याप्रकरणी चौघांवर गुन्हा दाखल करण्यात आला आहे. पोलीस कॉन्स्टेबल योगेश्वर कांतीलाल गायकवाड यांनी याप्रकरणी फिर्याद दिली आहे.
इरशाद हबीब शेख (वय ५०, रा. कृष्णानगर), असगरअली बदरूद्दीन मोमीन (वय ३६, रा. विक्रमनगर), महंमद मेहबूब मुल्ला (वय २१, रा. दत्तनगर) व फरखान रेहमतुल्ला मोमीन (वय १९, रा. माच्छरे गल्ली) अशी गुन्हा दाखल झालेल्यांची नावे आहेत. कोरोनाचा संसर्ग वाढत असल्याने जिल्हा प्रशासनाने आठ दिवसांचा कडक लॉकडाऊन पुकारला आहे. त्यामध्ये अत्यावश्यक सेवा वगळता सर्व आस्थापना बंद ठेवण्याचे आदेश आहेत. मात्र, असे असताना विक्रमनगर परिसरातील मारुती मंदिरनजीक असलेल्या मोमीन मांसाहारी दुकानात चोरट्या मार्गाने विक्री सुरु असल्याची माहिती मिळाल्यानंतर पोलिसांनी तेथे छापा टाकला. तेथे दुकानाच्या पाठीमागील दरवाज्यातून ग्राहकांना विक्री सुरू होती. त्यामुळे चौघांवर पोलिसांनी गुन्हा दाखल केला आहे.