इचलकरंजी : कोल्हापुरातील कळंबा मध्यवर्ती कारागृहातील सहकारी न्यायालयीन बंदींना मोबाईल व अन्य नशेचे साहित्य पुरवठा केल्याप्रकरणी पिस्तूल तस्कर मनीष नागोरी, विकास खंडेलवार या ‘विक्या-मन्या’ गॅँगच्या प्रमुखांसह चौघांवर दुसऱ्यांदा मोक्कांतर्गत (संघटित गुन्हेगारी) कारवाई करण्यात आली आहे. हा कारवाईचा प्रस्ताव पोलीस अधीक्षक शैलेश बलकवडे यांनी मंजुरीसाठी पाठवला होता, त्याला विशेष पोलीस महानिरीक्षक मनोज लोहिया यांनी मान्यता दिली.
विक्या ऊर्फ विकास रामवतार खंडेलवाल, शकील ऊर्फ शकलीन झाकीर गवंडी (दोघे रा. संग्राम चौक, इचलकरंजी), मन्या ऊर्फ मनीष रामविलास नागोरी (रा. यड्राव, ता. शिरोळ) व भीष्मा ऊर्फ भीमा सुभेदार चव्हाण (मूळ रा. रांजणी, ता. कवठेमहांकाळ, जि. सांगली) अशी त्यांची नावे आहेत.
पोलिसातून मिळालेली माहिती अशी, मोक्कांतर्गत कारवाईत कारागृहात असलेले मनीष व विकास यांच्यावर नोव्हेंबर व डिसेंबर २०२० या कालावधीत इचलकरंजीतील एका सूत व्यापाऱ्याला ठार मारण्याची धमकी दिली. त्या गुन्ह्यात उच्च न्यायालयात जामिनाची प्रक्रिया चालू असून, त्यासाठी २५ हजार रुपये दे, असे सांगून पंधरा हजार रुपये खंडणी स्वरूपात उकळले. दरम्यान, त्या पैशाचे दहा मोबाइल, पाच चार्जर, पाच नग सिव्हिल, दोन पेन ड्राईव्ह व गांजा कारागृहात पुरवल्याचे निष्पन्न झाले आहे. हा कारागृहात टाकलेला मुद्देमाल कोल्हापुरात जुना राजवाडा पोलिसांनी यापूर्वीच जप्त केला आहे. गेल्याच महिन्यात विक्या-मन्या गॅँगच्या सात जणांवर मोक्कांतर्गत कारवाई करण्यात आली आहे.
दरम्यान, मनीष व विकास यांची गुन्हेगारी संघटनेची पार्श्वभूमी पाहता, त्यांच्या गैरकृत्यांना लगाम घालण्याची आवश्यकता होती, त्याप्रमाणे त्या इचलकरंजीचे पोलीस उपअधीक्षक बाबूराव महामुनी यांनी या चौघांवर मोक्कांतर्गत कारवाईचा प्रस्ताव तयार करून पाठवला होता, त्याला मंजुरी देण्यात आली.
फोटो नं. ३००५२०२१-कोल-मनीष नागोरी (मोक्का)
फोटो नं. ३००५२०२१-कोल-विकास खंडेलवाल (मोक्का)
===Photopath===
300521\30kol_2_30052021_5.jpg
===Caption===
फोटो नं. ३००५२०२१-कोल-मनिष नागोरी (मोक्का)फोटो नं. ३००५२०२१-कोल-विकास खंडेलवाल (मोक्का)