रवींद्र पाटील
लोकमत न्यूज नेटवर्क
बाजारभोगाव : तळकोकणातून सुसाट वेगाने अंगावर येणारा थंडगार वारा... धुक्यात हरवलेले तळ कोकण, हिरवाईचा शालू नेसून नव्या नवरीवाणी सजलेल्या पर्वतरांगा, सोबतीला कारवी पक्ष्यांचा चिवचिवाट, कमालीची शांतता असं नयनरम्य दृश्य पडसाळी घाटमाथ्यावर अनुभवयास मिळत आहे. परंतु लोकप्रतिनिधी व प्रशासनाच्या दुर्लक्षामुळे हा परिसर पर्यटनदृष्ट्या पोरका राहिला आहे .
पन्हाळा पश्चिम भागाच्या शेवटच्या टोकाला पडसाळी गाव आहे. गावापासून दीड किलोमीटर अंतर पायी चालत गेल्यावर घाटमाथा पाहायला मिळतो. दूरवर पसरलेल्या तळकोकणचे नयनरम्य दृश्य डोळ्यांमध्ये साठवताना एक वेगळाच आनंद मिळतो. हिरव्यागार झाडी-झुडपातून घाटमाथ्यावरून कोकणाकडे गेलेली पायवाट, हिरवीगार शिवार, डोंगरमाथ्यावर फिरणारा जनावरांचा गोतावळा जणू स्वर्ग असल्याची अनुभूती देतो.
सह्याद्रीचा भक्कम बुरुज म्हणून ओळखला जाणारा, शिवशाही जिवंत ठेवणारा किल्ले मुडागड. कोल्हापूरपासून अवघ्या ६० किलोमीटर अंतरावर असणाऱ्या कोलिक व कोदे (ता. गगनबावडा) यांच्या डोंगरातील मध्यभागाच्या हद्दीवर आहे. छत्रपती शिवाजी महाराजांनी कोकण विभागावर नजर ठेवण्यासाठी कोलिक कोदे हद्दीवर गड बांधण्याचे निश्चित केले होते. त्यानुसार त्यांनी गडाच्या पायाचे बांधकाम रचण्यास सुरुवात केली होती. मात्र काही कारणास्तव गडाचे बांधकाम अर्धवट सोडून देण्यात आले आहे. काळाच्या ओघात दगडाचे दगडी अवशेष पर्यटकांना पाहता येतात.
सह्याद्रीच्या रांगांनी व्यापलेल्या या परिसरात सामावलेला पडसाळी लघू पाटबंधारे तलाव या तालुक्याच्या विकासाला चालना देणारा आहे. या जंगलाच्या शेवटच्या टोकाला कोकण किनारपट्टी सुरू होते. जंगल आणि किनारपट्टी हे एका दरीत विभागलेले आहेत. या घाटमाथ्यावरून तळकोकणातील दिसणारे निसर्गसौंदर्य पर्यटकांना भूरळ घालणारे आहे .
चौकटः
संयुक्त वन व्यवस्थापन समितीच्या माध्यमातून पडसाळी घाटमाथ्यावर वनखात्याने मनोरे उभारावेत. जेणेकरून पक्षी व वन्यजिवांचे पर्यटकांना दर्शन घेता येईल. निवासस्थाने उभारण्यासाठी प्रयत्न करावेत. यातून स्थानिकांना रोजगार मिळेल.
प्रकाश पाटील, कोलीक पैकी चाफेवाडी. सामाजिक कार्यकर्ते
फोटो ओळः
मुडागडचे अर्धवट बांधकाम झाल्याचे दगडी अवशेष आढळते.