महावितरण कंपनीने मनसेचे जिल्हाध्यक्ष गजानन जाधव यांच्या लक्ष्मी औद्योगिक वसाहतीमधील कारखान्याचा वीज पुरवठा खंडित केला होता. याचा जाब विचारत मनसेच्या कार्यकर्त्यांनी महावितरण कार्यालयाची तोडफोड केली. याप्रकरणी पोलिसांनी मनसेचा जिल्हाध्यक्ष जाधव याच्यासह योगेश दाभोलकर, साहील कोकटनूर, कृष्णा कोपार्डे, सुभाष शेंडे, रोहित कोतकर, वरद फातले, बबलू कांबळे आणि प्रमोद भाटले अशा नऊजणांना अटक केली. दरम्यान, त्यांना शनिवारी न्यायालयात हजर करण्यासाठी नेत असताना मोठे तळ्याजवळ पोलीस व्हॅन बंद पडली. पोलिसांनी व्हॅनला धक्का देऊन सुरू करण्याचा प्रयत्न केला. मात्र, व्हॅन सुरू न झाल्याने संशयितांना पोलिसांनी चालवीत न्यायालयात हजर केले.
चौकट - ऊर्जामंत्र्यांना जिल्ह्यात फिरू देणार नाही - लांडगे
वीज बिलात सवलत देण्याचे आश्वासन देऊनही ऊर्जामंत्री त्याचे पालन करीत नाहीत. त्यामुळे ऊर्जामंत्री नितीन राऊत यांना कोल्हापूर जिल्ह्यात फिरू देणार नाही, असा इशारा मनसेचे जिल्हा संपर्कप्रमुख जयराज लांडगे यांनी इचलकरंजीत पत्रकारांशी बोलताना दिला. मनसेकडून झालेल्या महावितरणच्या तोडफोडीच्या पार्श्वभूमीवर ते इचलकरंजीत आले होते. त्यांनी पोलीस अधिकाऱ्यांची भेट घेऊन चर्चा केली. त्यानंतर पत्रकारांशी संवाद साधला. भविष्यातही वीज पुरवठा खंडित करण्याचा प्रयत्न झाल्यास तो हाणून पाडू, असा इशाराही त्यांनी दिला.
(फोटो ओळी) इचलकरंजीत महावितरणच्या तोडफोडप्रकरणी अटक केलेल्या नऊजणांना पोलिसांनी शनिवारी न्यायालयात हजर केले.