Kolhapur Crime: तंबाखूची पुडी आणण्यासाठी बोलवून अल्पवयीन मुलीवर अत्याचार, संशयित आरोपीस अटक

घाबरलेल्या मुलीने घरी जाऊन हा प्रकार आईला सांगितला

कोल्हापूर : दुकानातून तंबाखूची पुडी आणण्याच्या निमित्ताने घरी बोलवून ११ वर्षीय मुलीवर अत्याचार केल्याप्रकरणी राजारामपुरी पोलिसांनी संशयित आरोपी शशिकांत याकुब घाटगे (वय ४०, रा. श्रीराम कॉलनी, टेंबलाईवाडी, कोल्हापूर) याला त्वरित अटक केली. हा धक्कादायक प्रकार रविवारी (दि. १) सायंकाळी साडेसहाच्या सुमारास घडला. याबाबत पीडित मुलीच्या आईने फिर्याद देताच पोलिसांनी कारवाई केली. घाटगे हा खासगी रुग्णालयात वॉर्ड बॉयचे काम करतो.

राजारामपुरी पोलिसांनी दिलेल्या माहितीनुसार, पीडित मुलीचे आई-वडील मजुरीचे काम करतात. रविवारी सायंकाळी संशयित आरोपीने तंबाखूची पुडी आणण्याच्या निमित्ताने ११ वर्षीय मुलीस स्वत:च्या घरी बोलवून घेतले. घरामागे असलेल्या बाथरूममध्ये नेऊन तिच्यावर जबरदस्तीने अत्याचार केले.

घाबरलेल्या मुलीने घरी जाऊन हा प्रकार आईला सांगितला. नातेवाइकांनी पोलिस ठाण्यात धाव घेऊन फिर्याद दिली. पोलिसांनी घटनेचे गांभीर्य लक्षात घेऊन तातडीने संशयित आरोपी घाटगे याला त्याच्या घरातून अटक केली. न्यायालयात हजर केले असता त्याची गुरुवारपर्यंत (दि. ५) पोलिस कोठडीत रवानगी झाली.

घाटगे हा राजारामपुरीतील एका खासगी रुग्णालयात वॉर्ड बॉयचे काम करतो. त्याची पत्नीही त्याच रुग्णालयात सेवाशुश्रूषेचे काम करते. त्याची मुले शालेय शिक्षण घेतात. त्याने केलेल्या किळसवाण्या कृत्यामुळे परिसरात खळबळ उडाली आहे.