कोपार्डे - कोल्हापूर-गगनबावडा रस्त्यावर कळंबे तर्फ कळे (ता. करवीर) येथे वासरे व रेडके कतलीसाठी घेऊन जाणारा रिक्षा टेम्पो हिंदुत्ववादी संघटनेच्या कार्यकर्त्यांनी पकडला. रिक्षा घेऊन जाणाऱ्या फारुख बेपारी नावाच्या व्यक्तीने तेथून पळ काढला. ही रिक्षा हिंदुत्ववादी कार्यकर्त्यांनी करवीर पोलिसांच्या ताब्यात दिली आहे.
कळंबे तर्फ कळे येथे टेम्पो रिक्षामधून (एमएच ०९जे - ६१७९) एक व्यक्ती लहान आठ-पंधरा दिवसाची गाईची वासरे व रेडके कतलीसाठी घेऊन जात असल्याचे लक्षात येताच त्याला थांबवून हटकले. यावेळी बजरंग दलाचे दीपक देसाई (भामटे) यांना याबाबतची माहिती दिली. त्यांनी या रिक्षा चालकाची झडती घेताच, त्याने आपले नाव फारुख बेपारी (रा. सदर बझार, कोल्हापूर) असे सांगितले. दोन वासरे व चार रेडकांनी भरलेली रिक्षा ताब्यात घेतली. ही रेडके व वासरे कतलीसाठी घेऊन जात असल्याची कबुली त्याने दिली.
दरम्यान, या कार्यकर्त्यांची नजर चुकवत फारूख याने ओढ्यात उडी मारून उसाच्या शेतात पलायन केले. बजरंग दलाच्या कार्यकर्त्यांनी ही रिक्षा करवीर पोलिसांच्या ताब्यात दिली असून रिक्षातील वासरे व रेडके पांजरपोळमध्ये सोडली आहेत. यावेळी रवी भोसले, दिनेश पारकर, विजय सणगर (साळवण) यांनी ही रिक्षा पकडली.