प्रशिक्षण नसल्याने औद्योगिक अपघात

एच. आर. धेंडे : सुरक्षा सप्ताहानिमित्त ‘लोकमत’मध्ये मार्गदर्शन

कोल्हापूर : मशीनवर काम करताना गप्पा मारणे, रसायने निष्काळजीपणे हाताळणे याबरोबरच पुरेसे प्रशिक्षण नसल्यामुळे औद्योगिक अपघात होतात. हे अपघात टाळायचे असतील, तर सुरक्षा साधने वापरण्याचे प्रशिक्षण कामगारांना देणे आवश्यक असल्याचे मत औद्योगिक सुरक्षा व आरोग्य विभागाचे सहसंचालक एच. आर. धेंडे यांनी मंगळवारी व्यक्त केले. ते ‘लोकमत’च्या शिरोली एमआयडीसी येथील कार्यालयात औद्योगिक सुरक्षा सप्ताहानिमित्त ‘औद्योगिक सुरक्षेचे महत्त्व’ या विषयावरील व्याख्यान आणि बक्षीस वितरण समारंभात प्रमुख पाहुणे म्हणून बोलत होते. यावेळी ‘लोकमत’चे सरव्यवस्थापक मकरंद देशमुख, व्यवस्थापक (निर्मिती) आनंद जवळकर, व्यवस्थापक (मनुष्यबळ व प्रशासन) संतोष भोगशेट्टी यांची प्रमुख उपस्थिती होती. कार्यक्रमाची सुरुवात ‘लोकमत’चे संस्थापक संपादक स्वर्गीय जवाहरलाल दर्डा यांच्या प्रतिमेला पुष्पहार अर्पण करून, तसेच एच. आर. धेंडे यांच्या हस्ते दीपप्रज्वलन करून झाली. धेंडे म्हणाले, औद्योगिक क्षेत्रातील ८८ टक्के अपघात हे कामगारांच्या असुरक्षित वृत्तीमुळे, तर फक्तदहा टक्के अपघात मशीनमधील बिघाडामुळे होतात. त्यामुळे अपघात टाळण्याच्यादृष्टीने साधनांच्या हाताळणीचे कामगारांना प्रशिक्षण देणे आवश्यक आहे. कामगारांनी काम करताना गप्पा न मारणे, सुरक्षा साधने वापरणे, रसायन, आॅईल गळतीवेळी तज्ञांची मदत घेणे, ज्या मशीनची दुरुस्ती, साफसफाई सुरू आहे, त्यांची माहिती सर्वांना दिल्यास अपघात टाळता येणे शक्य आहे. ज्या कारखान्यांमध्ये कामगारांच्या सुरक्षेची काळजी घेतली जात नाही, त्यांच्यावर कारवाई केली जात असल्याचे धेंडे यांनी सांगितले. संतोष भोगशेट्टी यांनी प्रास्ताविक केले. विविध स्पर्धांचे बक्षीस वितरण यावेळी सप्ताहाच्या निमित्ताने घेतलेल्या पोस्टर स्पर्धेत वृषाली शिंदे, अनिकेत ढवळे, सचिन ओतारी यांनी अनुक्रमे प्रथम, द्वितीय, तृतीय क्रमांक पटकावला. घोषवाक्य स्पर्धेत तानाजी पोरले यांनी प्रथम, तर प्रिया दंडगे यांनी द्वितीय क्रमांक पटकावला. विजेत्यांना प्रमुख पाहुण्यांच्या हस्ते बक्षीस देऊन गौरविण्यात आले.