हुपरी, हातकणंगले नगरपालिका बारगळणार

हुपरी ग्रामस्थ आक्रमक : जिल्हा परिषद, पंचायत समितीसाठी मतदारसंघाची रचना आहे तशीच ठेवण्याची शिफारस

दत्ता बीडकर-- हातकणंगले तालुक्यातील नव्याने होणारी हुपरी नगरपरिषद आणि हातकणंगले या तालुक्याच्या ठिकाणी होणारी नगरपंचायत स्थापन होण्याची आशा बारगळली असून, हुपरी ग्रामस्थांनी यासाठी पुन्हा आंदोलनाचा पवित्रा घेतला आहे. जानेवारी-फेब्रुवारीमध्ये होत असलेल्या जिल्हा परिषद आणि पंचायत समिती निवडणुकीसाठी हुपरी आणि हातकणंगले मतदारसंघाची आहे तशीच मतदार संघ पुनर्रचनेची शिफारस तहसील कार्यालयाच्या निवडणूक विभागाकडून जिल्हा निवडणूक विभागाकडे पाठविल्यामुळे तालुक्यामध्ये नगरपरिषद व नगरपंचायत स्थापन करण्याची आशा बारगळली आहे.हातकणंगले तालुक्यातील जिल्हा परिषद आणि पंचायत समिती निवडणुकीसाठीची मतदारसंघ पुनर्रचना आराखडा तालुका निवडणूक विभागाकडून जिल्हा निवडणूक विभागाकडे पाठविला आहे. हातकणंगले तालुक्यामध्ये ११ जिल्हा परिषद आणि २२ पंचायत समितीचे मतदारसंघ आणि त्यामध्ये समाविष्ट केलेल्या गावांचा तपशील तालुका निवडणूक विभागाकडून तयार केला आहे. राज्य निवडणूक आयोगाने दिलेल्या आदेशानुसार २००२, २००७ आणि २०१२ च्या तीन निवडणुकीतील मतदारसंघाची पुनर्रचना विचारात घेऊन नव्याने होणाऱ्या निवडणुकीसाठी २०११च्या जनगणनेची लोकसंख्या विचारात घेऊन मतदारसंघाची पुनर्रचना करण्याच्या सूचना दिल्या होत्या. मात्र तालुका निवडणूक विभागाकडून राज्य निवडणूक आयोगाचे आदेश व सूचना याला बगल देत २०१२ मध्ये असलेले मतदारसंघ आहेत तसेच ठेवून त्यात कोणतेही बदल न सुचविता तालुक्यामध्ये जिल्हा परिषदेचे अकरा व पंचायत समितीच्या बावीस मतदारसंघाची शिफारस केली आहे.तालुका निवडणूक विभागाकडून झालेल्या मतदारसंघ शिफारसीनुसार ९ सप्टेंबर रोजी मतदारसंघ प्रारूप आराखडा पुणे विभागीय आयुक्त कार्यालयाकडून प्रसिद्ध होणार असल्याने हुपरी आणि हातकणंगले जिल्हा परिषद मतदार संघ जसेच्या तसे ठेवले आहेत. यामुळे हुपरी नगरपरिषद आणि हातकणंगले नगरपंचायत स्थापन होण्याची आशा बारगळली आहे. यामुळे हुपरी नगरपरिषद होण्यासाठी कृती समितीकडून नव्याने आंदोलन तीव्र करण्याच्या हालचाली झाल्या आहेत. हुपरी नगरपरिषदेसाठी ग्रामविकास विभाग आणि विधि व न्याय विभागाने यापूर्वीच मंजुरी दिली आहे. फक्त नगरविकास विभागाची मोहर बाकी आहे. नगर विकास खाते खुद्द मुख्यमंत्र्यांकडे असल्यामुळे नगरपरिषदेची घोषणा होण्यासाठी राजकीय ताकद कमी पडत असल्याचे स्पष्ट होत आहे. नगरपरिषदेच्या घोषणेसाठी : राजकीय ताकद कमी पडतेयजिल्हा परिषद मतदार संघाची अंतिम घोषणा होईपर्यंत हुपरी नगरपरिषद आणि हातकणंगले नगरपंचायत स्थापनेची घोषणा शासनाकडून झाली तरच तालुक्यातील सर्वच जिल्हा परिषद आणि पंचायत समिती मतदार संघात मोठे फेरबदल होतील. मोठ्या प्रमाणात गावांची आदलाबदल होऊन तालुक्यामध्ये मोठ्या राजकीय उलथापालथी घडून येतील आणि याचे तालुक्याच्या राजकारणावर दूरगामी परिणाम होतील. हे शासनाचे जर-तरचे धोरण स्पष्ट करणार आहे. तालुक्यातील शिरोली आणि नागावचा कोल्हापूर शहर हद्दवाढीतील समावेश रद्द झाल्यामुळे शिरोली जिल्हा परिषद मतदारसंघ आणि त्या मतदारसंघातील गावेही जैसे थे राहिल्याने या भागातील नागरिकांनी आपली हद्दवाढीमधून सुटका झाल्याचा आनंद साजरा केला आहे.