गडहिंग्लज :
गडहिंग्लज-संकेश्वर या राज्य मार्गावर हेब्बाळ ते निलजी फाट्यापर्यंत अनेक मोठमोठे खड्डे पडले आहेत. त्यामुळे वाहतुकीस अडथळा निर्माण होऊन धोका निर्माण झाला आहे. संभाव्य धोका लक्षात घेऊन खड्डे तात्काळ बुजवावेत, अन्यथा रस्त्यावर एकेरी वाहतूक ठेवून आंदोलन करण्यात येईल, असा इशारा भारतीय किसान संघातर्फे देण्यात आला आहे.
यासंदर्भात प्रांताधिकारी विजया पांगारकर यांना निवेदन देण्यात आले आहे.
निवेदनात म्हटले आहे की, गडहिंग्लज-संकेश्वर रस्ता राष्ट्रीय महामार्ग म्हणून महाराष्ट्र शासनाकडे नोंद आहे; परंतु रस्त्यावरील खड्ड्यांमुळे वाहनधारकांना जीव मुठीत धरून वाहतूक करावी लागत आहे. त्यामुळे वेळेचा अपव्यय आणि जीव आणि वित्तहानीचा धोका निर्माण झाला आहे. सुरक्षित वाहतुकीसाठी सार्वजनिक बांधकाम विभागातर्फे रस्त्याची तात्काळ दुरुस्ती करण्याच्या सूचना द्याव्यात.
निवेदनावर, अमरनाथ घुगरी, राम पाटील, उमाशंकर मोहिते, सत्यजीत मोळदी, अजित नडगदल्ली आदींच्या स्वाक्षऱ्या आहेत.