कोल्हापूर जिल्हा परिषदेच्या मुख्य लेखा व वित्त अधिकारीपदी विलास तुकाराम पाटील यांची नियुक्ती करण्यात आली आहे. उपमुख्य लेखा व वित्त अधिकारी राहुल कदम यांची सांगलीला सहायक संचालक स्थानिक निधी लेखा म्हणून बदली करण्यात आली आहे. मंगळवारी या बदल्यांचे आदेश निघाले.
संजय राजमाने निवृत्त झाल्यानंतर राहुल कदम यांच्याकडे मुख्य लेखा व वित्त अधिकारी पदाचा कार्यभार होता. विलास पाटील हे मूळचे आजरा तालुक्यातील गवसेचे आहेत. कोल्हापूर जिल्हा कोषागार अधिकारी पदासह मंत्रालयातही त्यांनी काम केले आहे. सध्या ते शिवाजी विद्यापीठामध्ये वित्त व लेखा अधिकारी होते. याआधी त्यांनी जिल्हा परिषदेचे उपमुख्य लेखा व वित्त अधिकारी म्हणूनही काम पाहिले होते.
कदम यांच्या जागी रायगडहून फिरोज इलाई मुल्ला यांची बदली करण्यात आली आहे. ते आता उपमुख्य लेखा व वित्त अधिकारी म्हणून काम पाहतील.