कोल्हापूर : कोरोनाच्या पार्श्वभूमीवर पुकारलेल्या जिल्हाबंदीत सोमवारी दिवसभरात ४०५४ जणांनी कोल्हापूर पोलीस दलाच्या संकेतस्थळावर ऑनलाइन अर्ज भरून ई-पासची मागणी केली; पण त्यापैकी ३२९० जणांना ई-पास प्रशासनाने नाकारले. त्यांनी दिलेली कारणे सबळ नसल्याने हे ई-पास नाकारण्यात आल्याचे पोलीस प्रशासनाने सांगितले.
घरातील व्यक्तीचे लग्न, नातेवाइकाचा अंत्यविधी आणि अत्यावश्यक आरोग्य तसेच अडकून पडलेल्यांना जिल्ह्याबाहेर जाण्यासाठी पोलीस दलाकडून ई-पास देण्याची कार्यवाही सुरू केली आहे. जिल्ह्याबाहेर जाण्याची परवानगी मिळण्यासाठी ई-पाससाठी कोल्हापूर पोलीस दलाच्या http//covid19.mhpolice.in / या संकेतस्थळावर जाऊन अर्जदाराने कागदपत्रांची पूर्तता करायची आहे. त्यानंतर ई-पासबाबत निर्णय दिला जातो. त्यासाठी कोणत्या जिल्ह्यात जाणार, सबळ कारणाचा पुरावा द्यावा लागतो.
सोमवारी या संकेतस्थळावर ४०५४ जणांनी ई-पास मागणीचे अर्ज केले; पण त्यापैकी फक्त ५८१ जणांना जिल्ह्याबाहेर जाण्यासाठी ई-पास मंजूर केले, तर सबळ कारण नसल्याने ३२९० जणांचे अर्ज नामंजूर करून त्यांना ई-पास नाकारले. त्याशिवाय १८३ जणांचे ई-पास मंजूर झाले; पण त्याची वैधता संपल्याने त्याचा लाभ घेता आला नाही.