कसबा बावडा : येथील डी. वाय. पाटील अभिमत विद्यापीठाचा ९वा दीक्षांत समारंभ बुधवारी (दि. १७) हॉटेल सयाजी येथील व्हिक्टोरिया सभागृहात सकाळी ११ वाजता होणार आहे. या समारंभासाठी प्रमुख पाहुणे म्हणून मुंबई विद्यापीठाचे माजी कुलगुरू डॉ. विजय खोले उपस्थित राहणार आहेत. कार्यक्रमाच्या अध्यक्षस्थानी कुलपती डॉ. संजय डी. पाटील असणार आहेत. यावेळी अभिनेते आर. माधवन, साहित्यिक प्रा. कुन्तीनाथ करके यांना डी.लिट. व एअर मार्शल अजित शंकरराव भोसले यांना डी.एस्सी. पदवीने सन्मानित केले जाणार आहे, अशी माहिती कुलगुरू डॉ. राकेशकुमार मुदगल यांनी दिली. यावेळी प्र-कुलगुरू डॉ. शिम्पा शर्मा, कुलसचिव डॉ. व्ही. व्ही. भोसले, उपकुलसचिव संजय जाधव, परीक्षा नियंत्रक अरुण पोवार, आदी उपस्थित होते. डॉ. मुदगल म्हणाले, नवव्या दीक्षांत समारंभात एकूण ३६१ विद्यार्थ्यांना पदवी व पदव्युत्तर पदवी प्रदान केली जाणार आहे. यावेळी नऊ विद्यार्थ्यांना सुवर्णपदकाने, तर दोन विद्यार्थ्यांना एक्सलन्स ऑफ रिसर्च म्हणून सन्मानित केले जाणार आहे.
चौकट:.... दीक्षांत समारंभात डी.लिट. पदवीने सन्मानित केले जाणारे रंगनाथन माधवन हे फिल्म इंडस्ट्री व समाजसेवा क्षेत्रात कार्यरत आहेत. अभिनेता, लेखक आणि चित्रपट निर्माते आहेत. वयाच्या १८ व्या वर्षी कोल्हापूरच्या राजाराम महाविद्यालयात शिक्षण घेताना त्यांनी सांस्कृतिक प्रतिनिधी म्हणून भारताचे प्रतिनिधित्व करण्यासाठी शिष्यवृत्ती मिळविली. त्यांच्या ‘रंग दे बसंत’, ‘गुरू’ आणि ‘थ्री इडियट्स’ या तीन चित्रपटांनी प्रचंड यश मिळविले.
२)चौकट:.....
डी.एस्सी. पदवीने सन्मानित केले जाणारे भारतीय वायुसेनेचे निवृत्त एअर मार्शल अजित शंकरराव भोसले कोल्हापुरातील बस्तवडे गावात शेतकरी कुटुंबातले. त्यांनी नाशिकच्या भोसले मिलिटरी स्कूलमधून शालेय शिक्षण पूर्ण केले आणि १९७३ मध्ये ते पुणे येथील राष्ट्रीय संरक्षण अकादमी (एनडीए) मध्ये दाखल झाले. एम.एस्सी., एमबीए आणि एम.फिल पदवी घेतलेल्या भोसले यांनी टोकियोमध्ये जपानी सशस्त्र दलात एक वर्षाचे प्रशिक्षणही घेतले आहे. सियाचीन व श्रीलंका मोहीम आणि कारगिल युद्धात त्यांनी भाग घेतला आहे. ३)चौकट:... डिलीटने सन्मानित केले जाणारे कुन्तिनाथ देवेंद्र करके-पाटील हे डॉ. बापूजी साळुंखे यांचे विद्यार्थी आहेत. स्वामी विवेकानंद शिक्षण संस्थेत त्यांनी मुख्याध्यापक ते प्राचार्य म्हणून काम केले. पाजर, चैत्रपालवी, कांचन कुंभ, जलधारा असे साहित्य त्यांचे प्रसिद्ध आहे. औंदा लगीन करायचं, बोला दाजीबा, सख्या सजना, सुळावरची पोळी, सोंगाड्या, आदी चित्रपटातील गीते त्यांनी लिहिली आहेत. दूरदर्शनवर त्यांचे लोकसंगीताचे अनेक कार्यक्रम झाले आहेत.
फोटो... एअर मार्शल अजित शंकरराव भोसले, डॉ. विजय खोले, रंगनाथन माधवन, प्रा. कान्तीनाथ कुरके.