खेड्यापाड्यातील ग्राहक होतोय अपडेट; कोल्हापूर जिल्हा बँकेचा ७ हजार कोटींचा डिजिटल व्यवहार

ऑनलाईन व्यवहार वाढला, बँकेतील ग्राहक कमी झाला

राजाराम लोंढे

कोल्हापूर : जिल्हा मध्यवर्ती सहकारी बँकेत (केडीसीसी) चालू आर्थिक वर्षातील दहा महिन्यांत ग्राहकांनी तब्बल ७ हजार ७१६ कोटींचा डिजिटल व्यवहार केला आहे. यामध्ये सर्वाधिक ४,२९७ कोटी मोबाईल बँकिंग व्यवहार झाले आहेत. खेड्यापाड्यातील ग्राहक अपडेट होत असून, ऑनलाईन व्यवहार वाढल्याने ग्राहक बँकांच्या शाखेत येण्याचे प्रमाण कमी झाले आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

जिल्हा बँक ही ग्रामीण अर्थव्यवस्थेचा कणा आहे. बँकेच्या बहुतांश शाखा या छोट्या छोट्या गावांत आहेत. पण, गेल्या तीन-चार वर्षांपासून बँकेने नवीन तंत्रज्ञानाचा वापर करुन ग्राहकांना अद्ययावत सुविधा देण्यास सुरुवात केली आहे. राष्ट्रीयीकृत व खासगी बँकांच्या स्पर्धेत टिकून राहायचे असेल तर काळानुसार अद्ययावत तंत्रज्ञान आत्मसात केले पाहिजे. हे ओळखून ‘मोबाईल बँकिंग’, ‘यूपीआय’, ‘मायक्रो एटीएम’, ‘क्यूआर कोड’, ‘ए.टी.एम.’ आदी सुविधा बँकेने ग्राहकांना उपलब्ध करुन दिल्या आहेत. 

बँकेचे ९ लाखांपेक्षा अधिक ग्राहक आहेत, त्यापैकी ७५ टक्के ग्राहक ग्रामीण भागातील आहेत. त्यामुळे या सुविधांचा वापर ग्रामीण ग्राहक किती ताकदीने करणार याविषयी सुरुवातीला साशंकता होती. पण, बँकेच्या यंत्रणेने नियोजनबद्ध ग्राहकांपर्यंत सुविधा पोहोचवल्या. सुरुवातीच्या टप्प्यात याेजनांना अल्प प्रतिसाद मिळाला, पण चालू आर्थिक वर्षात कर्मचाऱ्यांनी झोकून देऊन काम केले.

पाच लाख ग्राहकांना ‘एसएमएस’ अलर्ट

जिल्हा बँकेशी नऊ लाखांहून अधिक ग्राहक कार्यरत आहेत. त्यापैकी ५ लाखांपेक्षा अधिक ग्राहकांनी ‘एसएमएस’ अलर्ट ही सेवा घेतली आहे. ऑनलाईन व्यवहार झाल्यानंतर तात्काळ मेसेज द्वारे त्याची माहिती ग्राहकांना होते.

या आर्थिक वर्षात असा झाला डिजिटल व्यवहार

सुविधा  - संलग्न ग्राहक - उलाढाल

• मोबाईल बकिंग - ७७ हजार २१३ - ४२९७ कोटी
• युपीआय  - १ लाख १९ हजार - ३१८२ कोटी
• मायक्रो एटीएम - ५१ हजार ११३  - ८४ कोटी
• क्यूआर कोड - १० हजार २८१ - १५३ कोटी

बँकिंग स्पर्धेत राहण्याबरोबरच ग्राहकांचा वेळ व पैशाची बचत व्हावी, यासाठी डिजिटल व्यवहार खूप महत्त्वाचे आहेत. गेल्या चार-पाच वर्षांत बँकेने खूप वेगाने वाटचाल करत ग्राहकांना जलद सेवा दिली आहे. जास्तीत जास्त ग्राहकांनी या सुविधा वापर करावा. - जी.एम. शिंदे (मुख्य कार्यकारी अधिकारी, जिल्हा बँक)