फुलेवाडी : फुलेवाडी नागरी आरोग्य केंद्रात कोरोना लसीकरणात वशिल्याने लस दिल्याने व लवकर लस संपल्याने संतप्त नागरिकांनी गुरुवारी गोंधळ घातला. नंबर घेण्यासाठी बाहेर असणाऱ्या आशा वर्कर यांना नागरिकांना समजावणे अवघड झाल्याने पोलिसांना पाचारण करण्यात आले. गुरुवारी केंद्रावर ३०९ लोकांनी नोंद केली, त्यापैकी १२२ जणांना लस देण्यात आली. उर्वरित नागरिकांची केंद्रावर भेटीसाठी आलेल्या उपायुक्त औंधकर यांनी समजूत काढण्याचा प्रयत्न करून परत पाठवले. लस संपल्याने वृद्ध नागरी व महिलांना ताटकळत बसण्याची वेळ आली.
लस घेण्यासाठी सकाळपासूनच महिलांसह नागरिकांनी मोठी गर्दी केली होती. लस कमी आहे असे समजतात काहींनी वशिल्याने आत घुसण्याचा प्रयत्न केला. परिणामी, नागरिकांनी गोंधळ करण्यास सुरुवात केली. त्यातच शिल्लक ६० डोस संपल्याने नागरिक अधिकच संतप्त झाले, परतचे फक्त ५० डोस मिळाले. गुरुवाारी दिवसभरात १२२ जणांना लस देण्यात आली. फुलेवाडी लसीकरण केंद्रामध्ये आजअखेर ५७५० जणांना पहिला आणि दुसरा डोस देण्यात आला आहे.
कोट : आम्ही सकाळपासून नंबरमध्ये आहोत. येथील आत सोडणाऱ्या कर्मचाऱ्याने वशिल्याने काहींना आत सोडल्याने गोंधळ उडाला. आम्हाला उन्हामध्ये ताटकळत उभे राहावे लागले. यंत्रणेमध्ये सुधार करण्याची गरज आहे.
-सोनाली हुक्किरेकर (लस घेण्यासाठी आलेली महिला)
आजपर्यंत सुरळीतपणे लसीकरण सुरू आहे. गुरुवारी लवकर लस संपल्याने नागरिकांनी गोंधळ केला. आशा वर्कर यांना नंबर लावण्याची जबाबदारी देऊनही काही नंबर खाली-वर झाले असण्याची शक्यता आहे.
-डॉ. सुनील नाळे, (केंद्रप्रमुख)
चौकट:
उद्याचे लसीकरण बंद
कोविशिल्डचे गुरुवारी आणलेले डोस संपल्याने आज, शुक्रवारी होणारे लसीकरण होणार नाही. डोस मिळाल्यानंतर लसीकरण सुरू होण्याची शक्यता आहे. लसीकरण केंद्रांमध्ये कार्यरत असणाऱ्या कर्मचाऱ्यांची संख्या कमी आहे. ग्रामीणसह शहरातील लोक फुलेवाडी केंद्रावर लस घेण्यासाठी येत आहेत. त्यासाठी महापालिका आरोग्य विभागाचे कर्मचारी नियंत्रणासाठी वाढवण्याची गरज आहे.
फोटो : २२ फुलेवाडी लसीकरण
ओळ : फुलेवाडी लसीकरण केंद्रावर झालेली गर्दी.