Kolhapur Crime: शहापूर - कृष्णानगर येथे तरुणाचा निर्घृण खून, चेहरा छिन्नविच्छिन्न केल्याने ओळख पटवणे कठीण

फॉरेन्सिक लॅबच्या पथकाने घटनास्थळावरून काही पुरावे गोळा केले

इचलकरंजी : शहापूर येथील कृष्णानगर परिसरातील महालक्ष्मीनगर येथे एका अनोळखी तरुणाचा रुमालाने गळा आवळून आणि डोक्यात दगड घालून निर्घृण खून केल्याची धक्कादायक घटना आज, बुधवारी सकाळी उघडकीस आली. हल्लेखोरांनी तरुणाचा चेहरा छिन्नविच्छिन्न केला असल्याने त्याची ओळख पटवणे कठीण झाले आहे. घटनास्थळी शहापूर पोलिस, फॉरेन्सिक लॅबचे पथक तसेच श्वान पथकाने भेट दिली आहे. तरुणाची ओळख पटल्यानंतर तपासाला गती येणार आहे.

'लोकमत महाराष्ट्रीयन ऑफ द इयर' कोण?... क्लिक करून आपलं मत नोंदवा!

कृष्णानगरकडून सोलगेमळ्याकडे जाणाऱ्या निर्जन रस्त्यावरील मोकळ्या रानात एका तरुणाचा मृतदेह रक्ताच्या थारोळ्यात पडल्याची माहिती सकाळी शहापूर पोलिसांना मिळाली. पोलिसांनी घटनास्थळी धाव घेत तपास सुरू केला. मृतदेहाशेजारी रक्ताने माखलेला दगड आणि मृताचे चप्पल मिळून आले आहे. फॉरेन्सिक लॅबच्या पथकाने घटनास्थळावरून काही पुरावे गोळा केले आहेत. 

श्वान पथकाने घटनास्थळापासून सोलगे माळ्याच्या दिशेने माघ काढला. घटनास्थळी पोलीस उपाधीक्षक विक्रांत गायकवाड, शहापूरचे पोलीस निरीक्षक सचिन सूर्यवंशी यांच्यासह पथकाने भेट दिली. मृताची ओळख पटवण्याचे काम सुरू असून त्यानंतर तपासाला गती येईल. मृतदेह शिवविच्छेदनासाठी रुग्णालयात पाठवण्यात आला आहे. घटनास्थळी बघ्यांची मोठी गर्दी झाली होती.