प्लॉटचा ताबा जबरदस्तीने घेण्यासाठी जागा मालकास मारहाण

कोल्हापूर : जागेचा ताबा जबरदस्तीने घेण्यासाठी जागा मालकास फरफटत नेऊन त्यांना विटानी, लाथाबुक्क्यांनी बेदम मारहाण करण्याचा प्रकार राजेंद्रनगर झोपडपट्टीत घडला. हल्ल्यात अरुण नारायण जगदने (वय ५९ रा. राजेंद्रनगर झोपडपट्टी, न्यू वसाहत) हे जखमी झाले. याप्रकरणी रेकॉर्डवरील गुन्हेगार विश्वनाथ उर्फ बिल्या सौदागर कांबळे, शंकर नागटिळे, देवदास अविनाश सकट (सर्व रा. राजेंद्रनगर झोपडपट्टी) या तिघांवर राजारामपुरी पोलीस ठाण्यात गुन्हा नोंद झाला आहे.

पोलिसांनी दिलेली माहिती अशी की, राजेंद्रनगर परिसरातील विश्वनाथ उर्फ बिल्या कांबळे हा पोलिसांच्या रेकॉर्डवर गुन्हेगार आहे. त्याची राजेंद्रनगर झोपडपट्टी परिसरात प्रचंड दहशत आहे. रविवारी सकाळी कांबळे तसेच त्याचे साथीदार शंकर नागटिळे, देवदास सकट यांनी अरुण जगदने यांच्या मालकीच्या राजेंद्रनगर झोपडपट्टी परिसरातील प्लॉटमध्ये लाकडी बांबू मारून अतिक्रमण केले. त्यानंतर सकाळी तिघांनीही अरुण जगदने यांचे घर गाठले. तेथे याची गळपट्टी पकडून त्याला फरफटत घरातून बाहेर ओढूले. तसेच रिकाम्या जागेचे एक लाख रुपये दे अन्यथा ती जागा मला दे, अशी धमकी त्यांनी जगदने यांना दिली. धमकीला न घाबरता जागा देणार नसल्याचे स्पष्ट सांगितल्याने संतप्त झालेल्या तिघांनी जगदने यांच्या डोक्यात वीट मारून तसेच लाथाबुक्क्यांनी मारहाण केली. त्यावेळी त्यांची पत्नी सोडविण्यासाठी आली असता त्या तिघांनी पत्नी व मुलाच्या अंगावरही विटा फेकून मारल्याने पत्नी किरकोळ जखमी झाली. याप्रकरानंतर आरडाओरडा होऊन गोंधळ उडाल्याने परिसरातील लोक जमा झाले, त्यानंतर तिघेही हल्लेखोर तेथून पळून गेले. याप्रकरणी अरुण जगदने यांनी राजारामपूर पोलीस ठाण्यात तक्रार दिली.