कोल्हापूर : विविध राज्यांत पसरत असलेल्या बर्ड फ्लू आजाराच्या संक्रमणाच्या धर्तीवर बुधवारी कोल्हापूर महानगरपालिकेच्या वतीने शहरातील विक्रेते, दुकानदार, पुरवठादार, व्यापारी यांनी घ्यावयाच्या दक्षतेबाबत कार्यशाळेचे आयोजन करण्यात आले होते.
या प्रशिक्षण कार्यशाळेचे प्रास्ताविक महापालिकेचे पशुवैद्यकीय अधिकारी डॉ. विजय पाटील यांनी केले. यानंतर महाराष्ट्र शासन पशुसंवर्धन विभागाचे सहायक आयुक्त डॉ. सॅम लुद्रीक यांनी बर्ड फ्लू आजाराचा प्रसार, संक्रमणाचे विविध टप्पे, संक्रमित पक्ष्यांमध्ये दिसून येणारी लक्षणे, इत्यादींबाबत माहिती दिली. शहरातील विक्रेत्यांनी दुकानांची सोडियम हायपोक्लोराईडद्वारे स्वच्छता करावी, वैयक्तिक स्वच्छता, हॅण्डग्लोव्हज, मास्क व टोपी वापरावी, पक्षी ठेवण्याचे पिंजरे व वाहने निर्जंतुक करावीत याबाबत माहिती दिली. कोणत्याही स्थितीत या आजाराबाबत नागरिकांमध्ये अफवा पसरणार नाहीत याबाबत दक्षता घेणे व शहरातील नागरिकांमध्येही प्रबोधन करण्याचे आवाहन केले.
महापालिकेच्या कत्तलखान्यामध्ये सर्व आवश्यक सुविधा उपलब्ध केलेल्या असून कोल्हापूर महापालिकेचे पशुवैद्यकीय अधिकारी डॉ. विजय पाटील यांनी दुकानदार यांना परस्पर दुकानामध्ये बकरी न कापता बापट कॅम्प कत्तलखाना येथे कापण्यासाठी विनंती केली. शहरातील स्थलांतरित पक्षी येणाऱ्या ठिकाणांवर लक्ष ठेवणे, मृत पक्षी आढळल्यास त्याला कोणत्याही स्थितीत स्पर्श न करता महापालिका अथवा पशुसंवर्धन विभागाच्या कार्यालयास कळवावे, असे आवाहन त्यांनी केले. माहिती शिक्षण व संवाद अधिकारी नीलेश पोतदार यांनी सर्व उपस्थितांचे आभार मानले.