Kalyan: कारागृहासमोर 'भाई'चा वाढदिवस साजरा करणाऱ्यांची पोलिसांनी चांगलीच जिरवली!

आधारवाडी कारागृहासमोर भाईच्या वाढ दिवसानिमित्त फटाक्यांची आतिषबाजी करणे भाईच्या समर्थकाना चांगलेच महागात पडले आहे. 

कल्याण: आधारवाडी कारागृहा समोर भाईच्या वाढ दिवसानिमित्त फटाक्यांची आतिषबाजी करणे भाईच्या समर्थकाना चांगलेच महागात पडले आहे. तिघांना अटक करुन खडकपाडा पोलिसांनी त्यांची धिंड काढली आहे. भाईच्या समर्थकांवर अनेक गुन्हे दाखल असल्याची माहिती आहे. कारागृहाच्या प्रवेशद्वाराजवळ फटाके फोडल्याने एकच खळबळ उडाली होती. याचा व्हिडिओ देखील चांगलाच व्हायरल झाला होता. त्याची गंभीर दखल घेत पोलिसांनी ही कामगिरी केली आहे.

कल्याणमधील आधारवाडी कारागृहाच्या मुख्य प्रवेशद्वारावर काही तरुणांनी फटाक्यांची आतिषबाजी केली. कारागृह पोलिसांनी मज्जाव केला असता त्यांच्यासोबत धक्काबुक्की करणारे फटाके फोडणारे तिथून पसार झाले. इतेकच नाही तर या तरुणांनी फटाके फोडल्याचा व्हीडीओ सोशल मिडियावर व्हायरल केली होता. ही बातमी एनडीटीव्हीने केली होती. यानंतर खडकपाडा पोलिसांनी या प्रकरणाचा तपास सुरु केला. व्हायरल व्हीडीओ आणि कारागृहातील सीसीटीव्हीच्या सहाय्याने चौघांची ओळख पटली. तपासा दरम्यान पोलिसांनी रोहित जगदाळे आणि त्यांच्यासोबत असलेल्या क्षितिज भगत आणि आकाश खडसे या तिघांना अटक केली. त्यांना कल्याण न्यायालयात हजरकेले. तिघांना पोलिसांनी दोन दिवसांची पोलिस कोठडी सुनावली.

चौथ्या आरोपीचा शोध सुरु आहे. अटक आरोपीची जेल परिसरात पोलिसांनी धिंड काढली. पुन्हा असा कोणी प्रकार करुन नये यासाठी पोलिसांनी ही कारवाई केली आहे. उल्हासनगरात एका हत्येच्या प्रकरणात सतीश कांबळे उर्फ सत्या भाई हा गेल्या सहा वर्षापासून कारागृहात आहे. त्याचा रविवारी वाढ दिवस होता. त्या वाढ दिवसानिमित्त त्याच्या समर्थकांनी कारागृहाच्या बाहेर फटाके फोडले. अटक आरोपी पैकी रोहित जगदाळे हा देखील हत्या प्रकरणात कारागृहात होता. काही दिवसापूर्वीच तो जामीनावर सुटला आहे. यातील अटक आरोपींच्या विरोधात गुन्हे दाखल असल्याची माहिती कल्याणचे सहाय्यक पोलिस आयुक्त कल्याणजी घेटे यांनी दिली आहे. चौथ्या आरोपीचा शोध सुरु आहे.