Ulhasnagar Crime: उल्हासनगर शहरात सोमवारी दुपारी एक अत्यंत हृदयद्रावक घटना घडली. कोणार्क कंपनीच्या एका सफाई कामगाराची नशेखोर परप्रांतीय तरुणाने चाकूने सपासप वार करून हत्या केली. पतीच्या मृत्यूचा धक्का सहन न झाल्याने पत्नीनेही राहत्या घरी गळफास घेऊन आपली जीवनयात्रा संपवली. या दुहेरी मृत्यूमुळे ३ आणि ४ वर्षांची दोन निष्पाप मुले अनाथ झाली असून संपूर्ण परिसरात हळहळ व्यक्त केली जात आहे.
उल्हासनगर महापालिकेने शहराच्या स्वच्छतेचा ठेका कोणार्क इन्व्हायरो कंपनीला दिला आहे. या कंपनीत कार्यरत असलेले सफाई कामगार महादू जगताप हे सोमवारी दुपारी १२ वाजेच्या सुमारास कॅम्प नंबर ३ मधील बॅरेक क्र. ८९६ परिसरात कर्तव्यावर होते. यावेळी जुन्या वादाचा राग मनात धरून दुर्गेशकुमार गुप्ता या नशेखोर परप्रांतीय तरुणाने त्यांच्यावर चाकूने हल्ला चढवला. आरोपीने जगताप यांच्यावर ३३ पेक्षा जास्त वार केले, ज्यामध्ये त्यांचा जागीच मृत्यू झाला. महादू जगताप हे पत्नी पूर्वी आणि दोन लहान मुलांसह शहाड गावठाण परिसरात राहत होते. पतीच्या हत्येची बातमी समजताच पत्नी पूर्वी यांनी रुग्णालयात धाव घेतली. पतीचा छिन्नविछिन्न मृतदेह पाहून त्यांना मोठा मानसिक धक्का बसला.
शहाड गावठाण येथील घरी परतल्यानंतर मृत जगताप यांची पत्नी पूर्वी हिने टोकाचे पाऊल उचलत गळफास घेऊन आत्महत्या केली. काही तासांच्या अंतराने आई-वडील दोघांचेही छत्र हरपल्याने त्यांच्या दोन लहान मुलांवर अनाथ होण्याची वेळ आली आहे. या घटनेचे पडसाद सफाई कामगारांमध्ये उमटले आहेत. कामगार संघटनेचे नेते संदीप गायकवाड यांनी या घटनेचा तीव्र निषेध केला असून आक्रमक पवित्रा घेत कामबंद सुरू केले. जोपर्यंत जगताप कुटुंबाला योग्य न्याय आणि आर्थिक नुकसान भरपाई मिळत नाही, तोपर्यंत शहरातील सफाईचे काम बंद ठेवण्याचा इशारा कामगारनेते संदीप गायकवाड यांनी दिला आहे. स्थानिक नेत्यांनी आणि कामगारांनी मयत जगताप यांच्या घरी धाव घेत माहिती घेतली.
पोलिसांकडून आरोपीला अटक
घटनेची माहिती मिळताच मध्यवर्ती पोलीस ठाण्याचे वरिष्ठ पोलीस निरीक्षक शंकर अवताडे पथकासह घटनास्थळी दाखल झाले. स्थानिक नागरिकांच्या मदतीने पोलिसांनी आरोपी दुर्गेशकुमार गुप्ता याला तात्काळ अटक केली आहे. फॉरेन्सिक पथकानेही घटनास्थळाचा पंचनामा केला असून, पोलीस या प्रकरणाचा अधिक तपास करत आहेत.
Web Summary : In Ulhasnagar, a cleaner was brutally stabbed to death by a migrant. Overwhelmed by grief, his wife committed suicide. Two young children are now orphaned, prompting outrage and a strike by sanitation workers demanding justice and compensation.
Web Summary : उल्हासनगर में एक प्रवासी ने सफाईकर्मी की बेरहमी से चाकू मारकर हत्या कर दी। सदमे से पत्नी ने आत्महत्या कर ली। दो छोटे बच्चे अनाथ हो गए, जिसके बाद सफाई कर्मचारियों ने न्याय और मुआवजे की मांग करते हुए हड़ताल कर दी।