जळगाव : गणपतीनगरातील रहिवासी सचिन प्रीतमदार जेठवाणी यांची घरासमोर लावलेली दुचाकी चोरून नेत असलेल्या चोरट्याला गुरुवारी मध्यरात्री २ वाजता रामानंदनगर पोलिसांनी रंगेहाथ पकडले. चोरट्याकडून दुचाकी हस्तगत करण्यात आली असून या प्रकरणी रामानंदनगर पोलिसात गुन्हा दाखल करण्यात आला आहे.
गणपतीनगरातील सचिन जेठवाणी हे कुटुंबीयांसह वास्तव्यास आहेत. त्यांच्याकडे एमएच १९ डीसी ५७११ क्रमांकाची मोपेड दुचाकी असून ती त्यांनी आपल्या घराच्या समोर उभी केली होती. दरम्यान, २६ रोजी मध्यरात्री २ वाजेच्या सुमारास त्यांना अचानक जाग आली व ते घराबाहेर आले. तेव्हा त्यांना अंगणात लावलेली दुचाकी दिसून आली नाही. नंतर रस्त्यावर येऊन दुचाकीचा शोध घेत असताना एक चोरटा त्यांची दुचाकी ढकलत नेत असल्याचे त्यांना दिसले. जेठवाणी यांनी चोर-चोर असे ओरडत असतानाच त्याचवेळी रात्री गस्तीवर असलेले रामानंदनगर पोलीस त्या ठिकाणी आले. त्यांनी दुचाकी चोरून नेणाऱ्या चोरट्याला रंगेहाथ अटक केली. त्याची कसून चौकशी केल्यानंतर त्याने आपले नाव राहुल गणेश महाजन (२०, रा. टिपू सुलतान चौक तांबापुरा) असे सांगितले. त्यानंतर जेठवाणी यांच्या फिर्यादीवरून गुन्हा दाखल करण्यात आला.