जामनेर तालुक्यात पाण्यात बुडून दोघांचा मृत्यू

 हिवरखेडे बुद्रुक येथे कपडे धुण्यासाठी गेलेली महिला पुराच्या पाण्यात वाहून गेली तर पहूरला नदीत बुडून तरुणाचा मृत्यू

जामनेर, जि. जळगाव : धुणी धुण्यासाठी येथील कांग नदी काठावर गेलेली महिला अचानक आलेल्या पुरात वाहून गेल्याची दुर्दैवी घटना शनिवारी सकाळी सहा वाजेच्या सुमारास घडली. हिवरखेडे बुद्रुक, ता.जामनेर येथील वाघूरच्या बॅक वॉटरजवळ महिलेचा मृतदेह सकाळी नऊ वाजेच्या सुमारास आढळून आला. कांग नदीने या वर्षात घेतलेला हा पाचवा बळी आहे.

जायेदाबी शब्बीर शाह (वय ४४, रा. बिस्मील्ला नगर, जामनेर) असे मृत महिलेचे नाव आहे. त्या शेजारील महिलांसोबत कपडे धुण्यासाठी कांग नदीवर गेल्या होत्या. नदीला अचानक आलेल्या पुरात त्या वाहून गेल्या. त्यांच्या पश्चात पती, ३ मुले, २ मुली, असा परिवार आहे. या घटनेने शहरात हळहळ व्यक्त होत आहे.

दुस-या एका घटनेत पहूर, ता.जामनेर येथे वाघूर नदीच्या पाण्यात बुडून शेख शाहरुख शेख आयुब (वय २७) या तरुणाचा दुदैर्वी मृत्यू झाला. तो शौचविधीस गेला असता, नदीत पाय घसरून पडला. त्यात त्याचा मृत्यू झाला. शनिवारी सकाळी ही घटना घडली.