जळगाव : शिवाजीनगर व परिसरातून बकऱ्या चोरी करणाऱ्या टोळीतील दोघांना पकडण्यात शहर पोलिसांना यश आले आहे. जुबेर भिकन शेख (वय २१, रा. गेंदालाल मिल) व गौरव जगन कोळी (वय २०,रा. शिवाजीनगर) अशी दोघांची नावे असून, त्यांच्याजवळ चोरलेल्या दोन बकऱ्या मिळून आलेल्या आहेत. दरम्यान, या दोघांनी मागील आठवड्यात अमळनेरातही एका जणाला मारहाण करून लुटल्याचा प्रकार उघड झाला आहे. रविवारी त्यांना न्यायालयात हजर केले असता दोन दिवसांची पोलीस कोठडी सुनावण्यात आली.
शिवाजीनगर व परिसरातील धनाजी काळे आणि हमालवाडा येथून तीन वेगवेगळ्या घटनांमध्ये एकूण १३ बकऱ्यांची चोरी झाल्याचे समोर आले आहे. याप्रकरणी शहर पोलिसात तीन गुन्हे दाखल झाले आहेत. कानळदा रोडवरील धनाजी काळेनगरातून वाल्मीक प्रभाकर वाघ (वय ४०) व राजू गणपत चौरे यांच्या प्रत्येकी दोन अशा एकूण चार बकऱ्या चोरट्यांनी चोरून नेल्याचे ८ जुलै रोजी समोर आले आहे. ही घटना ताजी असताना पुन्हा शिवाजीनगरातील हमालवाडा येथून धर्मेंद्र अंकुश चौधरी यांच्या मालकीच्या ३, किशोर गणपत गायकवाड यांच्या मालकीची एक, सुलताबाई नामदेव लोहार यांच्या मालकीच्या दोन, अजय राजेंद्र जगताप यांच्या दोन व नंदा बापू शेळके यांच्या काही बकऱ्या चोरी गेल्या होत्या. या गुन्ह्यातील दोन संशयित हे अमळनेर शहरात आल्याची माहिती शहर पोलीस ठाण्याचे पोलीस निरीक्षक धनंजय येरुळे यांना मिळाली. त्यानुसार अमलदार किशोर निकुंभ, रतन गिते, गणेश पाटील, प्रफुल्ल धांडे, विजय निकुंभ यांच्या पथकाला रवाना केले. पथकाने अमळनेरातून जुबेर शेख आणि गौरव कोळी यांना शनिवारी रात्री ताब्यात घेतले. तपास प्रफुल्ल धांडे करीत आहेत.