धक्का लागल्याने १३ वर्षाच्या मुलाचा गळा चिरून खून; मध्यप्रदेशातील मारेकऱ्यांची गुन्ह्याची कबुली

तेजसच्या खूनामागे धक्का लागल्याचे किरकोळ कारण, दोन अटकेत, तिसरा फरार

algaon Crime: जळगावच्या एरंडोल तालुक्यातील रिंगणगाव येथील तेजस गजानन महाजन या १३ वर्षीय मुलाच्या हत्या प्रकरणात महत्त्वाचा खुलासा झाला आहे. तेजसची गळा चिरून खून केल्याप्रकरणी दोनजणांना बुधवारी अटक करण्यात आली. यातील तिसरा संशयित मात्र पसार आहे. धक्का लागल्याच्या क्षुल्लक कारणावरून तीन जणांनी तेजसला मारहाण केली होती. त्यानंतर एकाने तेजसच्या गळ्यावर चाकूने वार करून खून केल्याची कबुली दिली आहे.

हरदास डेमशा वास्कले (वय ३५, रा. नांदीया, ता. भगवानपुरा, जि. खरगोन) आणि सुरेश नकल्या खरते (वय ३४, रा. धोपा, ता. झिरण्या, ता. खरगोन) अशी अटक करण्यात आलेल्यांची नावे आहेत. यातील तिसरा आरोपी रिचडिया तुकाराम कटोले (२०, रा. रा. नांदीया, ता. भगवानपूरा) याच्या शोधासाठी पथक रवाना झाले आहे. धक्का लागल्याच्या कारणासाठी तेजसची हत्या झाल्याने परिसरात हळहळ व्यक्त करण्यात येत आहे.

रिंगणगाव येथील आठवडे बाजारात सोमवारी सायंकाळी सुरेश खरते व रिचडीया कटोले हे फिरत असताना तेजस यास सुरेश वास्कूले याचा धक्का लागला होता. यावरुन वाद होऊन सुरेश वास्कूले याने तेजसला शिवीगाळ करून मारहाण केली. रिचडीया कटोले याने त्याच्याकडील चाकूने तेजसच्या गळ्यावर वार करून ठार केले. नंतर त्याला झाडाझुडपांत नेऊन टाकून दिले.

कसे सापडले आरोपी?

घटना घडल्यानंतर मंगळवारी सकाळीच वास्कले हा पत्नी समिता व मुलांसोबत कामानिमित्त आणि त्याच्या शेजारी राहणारा सुरेश खरते हा नातेवाइकांच्या लग्नासाठी गावातून पसार झाले. गावात शेतीकामासाठी आले असताना ते काम अपूर्ण सोडून हे दोघे गायब झाल्याने संशय बळावला. त्यानंतर तांत्रिक तपासाच्या मदतीने वास्कले हा फैजपूर-रावेर मार्गावर लावण्यात आलेल्या नाकेबंदीत अलगद सापडला. तर दुसरा आरोपी सुरेश खरते याला थोपा घाटात जाऊन पोलिसांनी अटक केली. पोलिसांच्या चौकशीत या दोघांनीही खुनाची कबुली दिली आहे.

दरम्यान, माझ्या मुलाचा नरबळीच असून या प्रकरणाचा खोलवर तपास करून न्याय मिळावा, अशी मागणी मयत मुलाचे वडील गजानन महाजन यांनी केली आहे. याविषयी त्यांनी जिल्हा पोलिस अधीक्षकांना निवेदन दिले.'माझ्या शेतात काम करणारा एक मजूर घटना घडण्याच्या अगोदरपासून संशयितांसोबत असल्याचे सीसीटीव्हीत कैद झाले आहे, असं गजानन महाजन यांनी सांगितले. या मजुरावर माझा संशय असून तो मोकाट असल्याचा दावाही त्यांनी निवेदनातून केला आहे.