तिच्याशिवाय मी जगूच शकत नाही...म्हणत कापल्या हाताच्या नसा!

लोकमत न्यूज नेटवर्क

जळगाव : विवाहित महिलेच्या प्रेमात वेडापिसा झालेल्या एका तरुणाने स्वतःच्या हाताच्या नसा कापून आत्महत्या करण्याचा प्रयत्न केल्याची घटना नागपुरातील बेलतरोडी पोलीस ठाण्याच्या हद्दीत सोमवारी दुपारी घडली. दीपक संजय पाटील (वय २७) असे आरोपीचे नाव आहे. तो एनगाव, ता. बोदवड, जि.जळगाव येथील रहिवासी आहे.

बेलतरोडीतील दोन मुलांची आई असलेल्या ३५ वर्षांच्या एका महिलेसोबत त्याची फेसबुकवर ओळख झाली. नंतर टॅक्सी ड्रायव्हर असलेला पाटील गेल्या वर्षी नागपुरात आला. त्याने महिलेशी संपर्क साधून तिचा पत्ता जाणून घेतला आणि तिच्या घरी पोहोचला. तेथे त्याने जाणे-येणे वाढविल्याने या दोघांचे सूत जुळले. बरेच दिवस त्यांचे प्रेमसंबंध गुपचूप सुरू होते. ३० जुलै २०२० रोजी त्याने या महिलेला जळगावला पळवून नेले. महिलेच्या नवऱ्याने बेलतरोडी पोलीस ठाण्यात तक्रार नोंदवली. पोलिसांनी मोबाइलवरून माग काढून जळगाव गाठले. तेथे त्यांनी महिलेला विचारपूस केली असता मी स्वमर्जीने पाटीलसोबत आली आणि आता मला परत यायचे नाही. पाटील सोबतच राहायचे आहे, असे तिने सांगितले. त्यामुळे पोलीस परत आले. दरम्यान, तब्बल सात महिने हे दोघे जळगावला पती-पत्नीसारखे राहत होते. नंतर त्यांच्यात खटके उडाल्याने तीन आठवड्यांपूर्वी ही महिला नागपुरात आपल्या घरी परतली. मोठ्या मनाच्या नवऱ्यानेही तिला स्वीकारले. सर्व सुरळीत असताना आता तीन दिवसांपूर्वी पाटील पुन्हा नागपुरात परतला. त्याने महिलेचे घर गाठले. तेथेच दोन दिवस मुक्काम ठोकला आणि तिला सोमवारी दुपारी आपल्या सोबत जळगावला घेऊन जाण्यासाठी जबरदस्ती करू लागला. महिलेने नकार दिला. त्यामुळे त्याने तिच्याशी वाद घालून तिच्या घरातील भाजी कापण्याच्या चाकूने आपल्या दोन्ही हाताच्या नसा कापून घेतल्या. या प्रकारामुळे घाबरलेल्या महिलेने आरडाओरड केली. तर तिच्या पतीने बेलतरोडी पोलिसांना माहिती दिली. ठाणेदार विजय आकोत यांनी आपल्या सहकाऱ्यांसह घटनास्थळी पोहोचून जखमी पाटीलवर उपचार करून घेतले. त्यानंतर महिलेच्या पतीच्या तक्रारीवरून त्याने आरोपी पाटील विरुद्ध आत्महत्या करण्याचा प्रयत्न केल्याच्या आरोपाखाली गुन्हा दाखल केला.

---

... हिच्या वाचून करमेना !

पोलिसांनी आरोपी पाटीलला विचारणा केली असता त्याने ‘हिच्यावाचून मी जगू शकत नाही. मला करमतच नाही,’ असे सांगितले. पोलिसांनी त्याची कशीबशी समजूत घालून त्याला जळगावला पाठवून दिले.

---