आफ्रिकेच्या विधीमंडळात रक्षा खडसे यांचे भाषण

राष्ट्रकुल युवा संसद सदस्यांच्या अधिवेशनामध्ये रावेर लोकसभा मतदारसंघाच्या खासदार रक्षा खडसे यांनी ''भारतीय लोकशाही आणि सुशासन'' या विषयावर आपले विचार मांडले.

मंबाथो : राष्ट्रकुल युवा संसद सदस्यांच्या अधिवेशनामध्ये रावेर लोकसभा मतदारसंघाच्या खासदार रक्षा खडसे यांनी ''भारतीय लोकशाही आणि सुशासन'' या विषयावर आपले विचार मांडले. या अधिवेशनाची सुरुवात २ रोजी दक्षिण आफ्रिकेच्या वायव्य प्रांताच्या ''मंबाथो'' येथील विधीमंडळ सभागृहात झाली. वायव्य प्रांताच्या विधिमंडळाच्या अध्यक्षा सुसाना रिबेका, विविध राष्ट्रकुल देशांच्या संसद तसेच विधीमंडळातून आलेले युवा संसद सदस्य व विधीमंडळ सदस्य उपस्थित होते. खासदार खडसे यांनी भारतातील संसद व विधीमंडळ सदस्यांच्या निवडणुकीची प्रक्रिया, स्थानिक स्वराज्य संस्थांच्या सदस्यांची निवड प्रक्रिया याबाबत माहिती दिली. भारतासारख्या मोठय़ा व खंडप्राय देशामध्ये सुशासन राहण्यासाठी राजकीय व्यवस्था, कार्यकारी व प्रशासकीय व्यवस्था, न्यायपालिका व प्रसिद्धी माध्यमांची भूमिका कशी महत्त्वाची आहे, याबाबत विचार मांडले.

------------

पंचायती राज व्यवस्थेतील जिल्हा परिषद, पंचायत समिती आणि ग्रामपंचायत या त्रिस्तरीय रचनेमधील राजकीय पक्षांची, प्रशासनाची भूमिका तसेच राजकीय आणि प्रशासकीय व्यवस्थेमध्ये सुशासन आणण्याच्या दृष्टीने आवश्यक असलेल्या सुधारणांबाबतही त्यांनी मत व्यक्त केले.