जालना : भरधाव कारने दुचाकीला धडक दिल्याने झालेल्या अपघातात एकजण ठार, तर एकजण गंभीर जखमी झाला आहे. जालना - देऊळगावराजा रोडवर वाघ्रुळ शिवारात ही घटना घडली. तारेराव गणपत जगताप असे मयताचे नाव असून, विठ्ठल रमाजी जगताप (दोघेही रा. निवडुंगा, ता जाफराबाद) असे गंभीर जखमी झालेल्या व्यक्तीचे नाव आहे. याप्रकरणी विठ्ठल जगताप यांच्या फिर्यादीवरून तालुका जालना पोलीस ठाण्यात गुन्हा दाखल करण्यात आला आहे.
वाहनधारकांचे सिग्नलकडे दुर्लक्ष
जालना : शहरातील शनि मंदिर, मुथा बिल्डिंग, मामा चौक आदी भागांतील सिग्नल सुरू करण्यात आलेले आहेत. सिग्नल सुरू असतानाही वाहनधारक त्याकडे दुर्लक्ष करून वाहने चालवत आहेत. यामुळे शहरातील शनि मंदिर, मुथा बिल्डिंग, मामा चौक आदी भागांत वाहतूक ठप्प होत आहे. सिग्लनकडे दुर्लक्ष करणाऱ्यांवर कडक कारवाई करण्याची मागणी होत आहे.
मासेगावात गुरूवारी यात्रा महोत्सव
जालना : घनसावंगी तालुक्यातील मासेगाव येथील तळ्यातील मारोती संस्थान येथे १३ जानेवारी रोजी यात्रा महोत्सव आयोजित करण्यात आला आहे. या यात्रेत कोरोनाच्या पार्श्वभूमीवर असलेल्या नियमांचे पालन करण्याच्या सूचना देण्यात आल्या आहेत. तमाशा, पाळणे व करमणुकीची साधने यावर बंदी घालण्यात आली आहे, अशी माहिती संस्थानचे अध्यक्ष बळीराम महाराज माघाडे, पुजारी दत्ता महाराज आनंदे, विष्णू आनंदे, लिंबाजी भानुसे, अशोक भानुसे आदींनी दिली.
गोंदी ठाण्यात पोलीसपाटलांची बैठक
जालना : अंबड तालुक्यातील गोंदी पोलीस ठाण्यात ग्रामीण भागातील ग्रामपंचायत निवडणुकीच्या अनुषंगाने बैठक घेण्यात आली. यावेळी पोलीस निरीक्षक शीतलकुमार बल्लाळ यांनी मार्गदर्शन केले. यावेळी पोलीसपाटलांचा सत्कार करण्यात आला. या बैठकीला २० गावातील पोलीसपाटील हजर होते. याप्रसंगी इलियास बागवान, संपत खरात, मुंजाबा वराडे आदींची उपस्थिती होती.