तळणी : मंठा तालुक्यातील वझर सरकटे या वाळू पट्ट्याचा लिलाव १५ डिसेंबरला झाला होता. त्यानंतर १२ जानेवारी रोजी संबंधित गुत्तेदाराला वाळू उत्खनन करण्यासाठी महसूलकडून ताबा देण्यात आला. मात्र, ताबा देताना महसूलकडून शासन नियमांची पायमल्ली करण्यात आली असून, स्थानिकांना अंधारात ठेवून गुत्तेदाराला वाळूघाट्याचे ताबे दिल्याचा आरोप ग्रामस्थांनी केला आहे.
वझर सरकटे २ या वाळू पट्टयातून गट क्र २०७, २१० व २१४ मधून ४०० मीटर लांबी, २५ मीटर रुंदी व १ मीटर खोली इतक्या क्षेत्रातून ३ हजार ५३३ ब्रास वाळू उत्खननाची सरकारी किंमत ७६ लाख ५१ हजार ५४४ इतकी आहे. गुत्तेदार प्रल्हाद कारभारी दराडे (रा. झोंटीगा ता. सिंदखेडराजा बुलडाणा ) यांनी ई टेडरिंग व ई ऑक्शन किमतीच्या जास्त म्हणजे १ कोटी १९ लाख ७९ हजार ५४४ इतक्या बोलीत घेतला. संबंधित गुत्तेदाराने १०० टक्के रक्कम अप्पर जिल्हाधिकारी कार्यालयाकडे भरणा केल्यामुळे सदर वाळू पट्ट्याचा ताबा मंठा तहसीलदार सुमन मोरे, मंडळ अधिकारी पांडुरंग घुगे, तलाठी अनिल उफाड यांनी शुक्रवारी दिला. मात्र, संबंधित गुत्तेदाराला ताबा देताना शासनाने ठरवून दिलेल्या नियमांची पायमल्ली महसूलकडून करण्यात आल्याचा आरोप स्थानिकांनी केला. याबाबत तळणीचे मंडळ अधिकारी पांडुरंग घुगे यांना विचारले असता, गट क्रमांक व लांबी, रुंदी मोजून, चुना टाकून, खुना करुन वाळू पट्टा दिल्याचे ते म्हणाले. तर परतूरचे उपविभागीय अधिकारी भाऊसाहेब जाधव यांनी तहसीलदारांना शासनाच्या नियमाप्रमाणे ताबा देण्याचे आदेश देण्यात येतील, असे सांगितले.
एक कोटी २१ लाखाची बोली
देवठाणा- उस्वद या वाळू पट्टयातून देवठाणा गट क्र. २५३ ते २५१, २१८ ते २११ व उस्वद गट क्र ४०४ ते ४०७, १ ते ४ मधून ५२२ मीटर लांबी, ६० मीटर रुंदी व ०.५ मीटर खोली इतक्या क्षेत्रातून ५ हजार ५३३ ब्रास वाळू उत्खननाची सरकारी किंमत १ कोटी १९ लाख ९५ हजार ५४४ रूपये इतकी आहे. तर संदिप हिरासिंग राजपूत (रा. दहिद बु. जि बुलडाणा) यांनी १ कोटी २१ लाख ९९ हजार ९९९ रूपये बोलीत घेतला आहे.