'माझ्यासह धनंजय मुंडे, अमोल खुणेची नार्को टेस्ट करा!'; मनोज जरांगे यांची पोलिसांकडे मागणी

सोशल मीडियावर व्हायरल झालेल्या कॉल रेकॉर्डिंगविषयी बोलताना मनोज जरांगे यांनी धनंजय मुंडे यांचे नाव न घेता त्यांना थेट इशारा दिला.

जालना : मराठा आरक्षण आंदोलनाचे नेते मनोज जरांगे यांनी आपल्या घातपाताच्या कथित कटप्रकरणी आता आक्रमक पवित्रा घेतला आहे. संशयित आरोपी अमोल खुणे याने स्वतःहून नार्को टेस्टची मागणी केली असेल, तर त्याचा अर्ज तत्काळ न्यायालयात सादर करावा. माझ्यासह धनंजय मुंडे, अमोल खुणे आणि इतर अशा पाच जणांची नार्को टेस्ट करून या प्रकरणातील सत्य काय आहे ते पुढे आणावे, अशी मागणी मनोज जरांगे यांनी जालना पोलिस अधीक्षकांकडे केली आहे.

गुरुवारी दुपारी मनोज जरांगे-पाटील यांनी पोलिस अधीक्षकांची भेट घेऊन मागणीचे निवेदन दिले. यावेळी प्रसार माध्यमांशी बोलताना त्यांनी धनंजय मुंडे यांच्यावर गंभीर आरोप केले. अमोल खुणे यांच्या खांद्यावर बंदूक ठेवून धनंजय मुंडेंनीच माझ्या घातपाताचा कट रचला आहे, असा दावा जरांगे यांनी केला आहे. माझ्या जीवाला धोका असल्याचे मान्य करतानाच जरांगे यांनी माझी सुरक्षा व्यवस्था काढून घ्या, अशी मागणी पोलिस अधीक्षकांकडे केली आहे.

कॉल रेकॉर्डिंगवरून थेट आव्हान
सोशल मीडियावर व्हायरल झालेल्या कॉल रेकॉर्डिंगविषयी बोलताना मनोज जरांगे यांनी धनंजय मुंडे यांचे नाव न घेता त्यांना थेट इशारा दिला. मला मारायला ये, तुझे बोटंही परत जाऊ देणार नाही, अशा शब्दांत त्यांनी आव्हान दिले. कट रचण्याच्या या प्रकरणातील सर्व आरोपींचा जामीन रद्द करून त्यांची पुन्हा सखोल चौकशी करण्यात यावी, अशी मागणीही त्यांनी यावेळी केली. अमोल खुणेचा नार्को टेस्टचा अर्ज पोलिसांनी विनाविलंब न्यायालयात सादर करावा, यावर मनोज जरांगे ठाम आहेत.