जालन्यात पोलिसांची हप्तेखोरी चव्हाट्यावर; चौदा महिन्यांत ८ पोलिस एसीबीच्या जाळ्यात

वाळू आणि जुगार अड्ड्यांसाठी पोलिसांची हप्तेखोरी, महसूल विभागही मागे नाही

जालना : मंठा ठाण्यात केलेल्या कारवाईनंतर पोलिसांची हप्तेखोरी चव्हाट्यावर आली आहे. साडेचौदा महिन्यांत वाळू, जुगार, दारू, अवैध धंद्ये सुरू ठेवण्यासाठी व गुन्ह्यात मदत करणे आदी कारणांसाठी ८ पोलिस लाचेच्या जाळ्यात अडकले आहेत. यात एका निरीक्षकासह ७ कर्मचाऱ्यांचा समावेश आहे. त्यांनी ६९,६०० रुपयांची लाच घेतल्याचे सांगण्यात आले.

उद्योगनगरी असलेल्या जालन्यात अवैध धंद्यांमध्ये मोठ्या प्रमाणात वाढ झाली आहे. वाढत्या अवैध धंद्यांमुळे गुन्हेगारीचे प्रमाणदेखील वाढले आहेत. जिल्ह्यातून पूर्णा, गोदावरी यासह लहान-मोठ्या नद्या जातात. त्यामुळे मोठ्या प्रमाणात वाळू उपलब्ध आहेत. वाळूची वाहतूक करू देण्यासाठी पोलिसांना हप्ते दिले जात असल्याचे मंठा ठाण्यात गुरुवारी केलेल्या कारवाईतून उघडकीस आले आहेत. त्यामुळे खळबळ उडाली आहे.

महसूल विभागातही हप्तेखोरी

अवैध वाळू तस्करी सुरू ठेवण्यासाठी महसूल विभागाचे अधिकारी व कर्मचारी देखील लाच घेतात. लाचलुचपत प्रतिबंधक विभागाने गेल्या १३ महिन्यांत ५ कारवाया करून ६ जणांना ताब्यात घेतले. त्यांनी ५ लाख ११ हजार ५०० रुपयांची लाच स्वीकारली आहे. यातील काही जणांनी इतर कारणांसाठी देखील लाच स्वीकारली आहे.