जालना : बीड जिल्ह्यातील परळी येथून विटा घेऊन आलेल्या ट्रकचे टायर फुटल्याने दुभाजकावर आदळून ट्रक उलटला. सुदैवाने या अपघातात जीवितहानी झाली नाही. ट्रकचालक व क्लिनर सुखरुप बाहेर पडले. ही घटना बुधवारी सकाळी दहाच्या सुमारास मंठा बायपासवरील अंबड चौफुलीपासून काही अंतरावर घडली.
बीड जिल्ह्यातील परळी येथून विटा घेऊन (एमएच १२ एचडी ४३९२) या क्रमांकाचा ट्रक जालन्यात आला. येथील एका व्यावसायिकाला विटा देण्यात येणार होत्या. ट्रक अंबड चौफुलीपासून काही अंतरावर असताना ट्रकचे समोरचे टायर फुटले. त्यामुळे चालकाचे नियंत्रण सुटले आणि ट्रक दुभाजकावर जाऊन आदळला आणि उलटला. यामुळे नुकतेच तयार करण्यात येत असलेला एका पथदिव्याचा खांबही तुटला आहे.
दरम्यान, मंठाकडून येणाऱ्या दुचाकीस्वाराने ट्रक उलटत असल्याचे पाहून दुचाकी जागीच थांबविल्याने अनर्थ टळला. ट्रक उलटल्यामुळे चाके निखळली व पाटाही तुटला. एवढा भयंकर अपघात असूनही चालक व क्लीनर सुखरूप बाहेर पडले. अपघातानंतर ट्रकमधील संपूर्ण विटा रोडवर पडल्या होत्या. यानंतर काहीवेळ वाहतूक खोळंबली होती. परंतु, विटा बाजूला करुन नंतर रस्ता सुरळीत करण्यात आला. दुपारनंतर त्या ट्रकमधील विटा दुसऱ्या ट्रकमध्ये टाकून नेण्यात आल्या.
.........फोटो ॲक्सिडेंट