"संपवल्याशिवाय स्वस्थ बसणार नाही", नौदल प्रमुख ठार होताच इराण खवळला, इस्रायलला खुली धमकी

Iran Israel war: इराणच्या लष्करातील आणखी एक महत्त्वाचा अधिकारी हवाई हल्ल्यात ठार झाला. कमांडर अलिरेझा तंगसिरी यांच्या मृत्युनंतर इराण खवळला असून, इस्रायला नष्ट करण्याची धमकी दिली आहे. 

इस्रायलच्या सैन्याने चार दिवसांपूर्वी एक माहिती जाहीर केली. इस्रायलच्या आयडीएफने म्हटले होते की, आम्ही केलेल्या हल्ल्यात इराणच्या नौदलाचे कमांडर अलिरेझा तंगसिरी हे ठार झाले आहेत. इस्रायलच्या या दाव्याला चार दिवस लोटल्यानंतर इराणने याबद्दलची माहिती दिली. अलिरेजा तंगसिरी हे हल्ल्यात जखमी झाले आणि त्यातच त्यांचा मृत्यू झाला असे आता इराणच्या इस्लामिक रिव्हॉल्युशनरी गार्ड कॉर्प्सने म्हटले आहे. 

इस्रायलने केलेल्या हवाई हल्ल्यात तंगसिरी ठार झाल्यानंतर इराण खवळला. आयआरजीसीने नौदलाचे प्रमुख कमांडर तंगसिरी यांच्या मृत्यूचा बदला घेतल्याशिवाय स्वस्थ बसणार नाही, असे सांगत इस्रायलला धमकी दिली आहे. 

आयआरजीसीशी संबधित तस्नीम संस्थेने म्हटले आहे की, "तंगसिरी सैन्याला एकसंध करत होते. बेटे आणि समुद्र किनाऱ्यांची सुरक्षा आणखी वाढवत होते. हल्ल्यात ते गंभीर जखमी झाले होते. त्यातच त्यांचा मृत्यू झाला." 

"आयआरजीसी नौदलाने तंगसिरी यांच्या मृत्यूनंतरही मोठे हल्ले केले आहेत आणि होर्मुझ सामुद्रधुनीवरील आपले नियंत्रण कायम ठेवले आहे. जोपर्यंत आम्ही शत्रूला पूर्णपणे संपवणार नाही, तोपर्यंत स्वस्थ बसणार नाही", अशी धमकीच इराणने इस्रायलला या घटनेनंतर दिली आहे. 

अलिरेझा तंगसिरी हे आयआरजीसीमध्ये म्हणजे इराणच्या लष्करातील सर्वात वरिष्ठ कमांडरांपैकी एक होते. ते सध्या होर्मुझ सामुद्रधुनीतून ये-जा करत असलेल्या तेल आणि गॅस जहाजांवर नजर ठेवत होते.

इराकमध्ये मिसाईल हल्ला, विमान उद्ध्वस्त

इराकमध्ये मिसाईल हल्ला करण्यात आल्याची माहिती इराकच्या संरक्षण मंत्रालयाने दिली आहे. मोहम्मद अली हवाई तळावर करण्यात आलेल्या मिसाईल हल्ल्यात एक विमान पूर्णपणे नष्ट झाले आहे. 

हा हल्ला सोमवारी (३० मार्च) बगदाद आंतरराष्ट्रीय विमानतळापासून जवळच ही घटना घडली. या हल्ल्यात जखमी किंवा मृत्यू झाल्याची माहिती अद्याप कळू शकलेली नाही. 

इराकच्या संरक्षण मंत्रालयाने म्हटले आहे की, लष्करी तळांना आणि लष्कराशी संबंधित ठिकाणांवर हल्ले करणे हे भित्रेपणाचे लक्षण असून हे पूर्ण गुन्हेगारी कृत्य आहे.